Popular Bible Verses from Yesaia 43

Share

Bɛnu, lɛla lɛwɔdi na muudie keyi ɔƒɛni! Munuu bina anumi alanu ka lɛ́kɔ lɛɛlɛ́? Lídie lilu lɛ́siaku kalɔ kakwiidi kemmo na ntukpa bɔ́lɛ kalɔ kakwiidi kani mɔɔwia ntu geen kemmo.

Na si bɛɛvia ketu bonwu kani nágyu dɛ muedi ni, nliku-mii na bilánu-ka. Na si ogya kemmo na bɛkɛ muedi ulakyula-mii. Na ogya unyemi ɔmmɔ lɛnɔ ulekeyi-mii.

Bɛyiƒala uwi ɔni návi, na bɛda kuuku uwi etemila bidie kasusu, na ɔdi ɔsɔ uteti ɔmmɔ utada.

Unwoti ɔnini, “Ami nédie amii Yakob kaba kemmo bebi na lɛ́bla-mii na bɛdi Israel kadi. Bɛda bɔyia bɛya, ɔsika ami nédie-mii. Lɛ́sia-mii lɛnyi lɛni na mɔɔlɔ-mii na ɔƒaani bɛdi mina badi.

Bɛ́ƒɔ-mi kuye geen na mɔɔyɔ́-mii. Anwuɔsu na lídie kɔlɔ bamba ku bana bekyuli atu kalɛ na lɛƒɔ-mii.

Ami ndi bina Unwoti Israel Katɔti Kedee ɔni mɔɔƒɔ́-mii ngba. Na kalɛ na amii bɛkɛ bɔnwuna ɔsu ni, lídie Egyipte ku Kus ku Seeba kadi bekyuli ƒui atu.

Bitayia, ɔsika nliku-mii. Na ndubɔsala-mii lɛsiku ɔƒɛ katukɔ ku kanukɔ ƒui liboku liku linwi.

“Nsu na ukyuli ɔni na ndi ɔsu ni, mɔɔƒɔ bina ekpidi teedie-mii lɛlɔ uwi biala. Anwuɔsu ndubo bina ekpidi ani ƒui na bɛ́bla bɛ́ƒiɔ-mi bɔyiƒala.

Mina bekyuli, amii ndi mina kabla bablane ku litemi lɛmɛni kenye bediene. Na mɔɔwia ka bɛti-mi na biti bina kayi bɛsia-mi lɛlɔ na binu kalɔ ka ami lɛti ndi Katɔti. Ami kani nákya uwi ɔni návi na ami kani ndubo bɔkya uwi ɔni lɛnɔ mebo, ɔsika ɔdi ɔsɔ uuubo mina kalɛ.

Ami lɛti kani ndi Unwoti ɔmmɔ, na ami ndubɔƒɔ-mii ngba.

Ami ndi Katɔti ɔƒɛni ku uwi ɔni mebo lɛnɔ úsela ƒui. Ukyuli ɔdi ulakana-mii buƒie bɔƒɔ mina kudɔ na ɔdi lɛnɔ ulakana bunye bɔda-mi ulu lɛlɔ.

Beƒiebuo ƒui baabu-mi ku bekuku ku beƒukutu na ntu bɔni na líte mina kadi bekyuli baƒunadi ka bani na kalɔ kakwiidi kemmo ɔsu. Lɛ́bla-ma na badi mina kadi bekyuli kalɛ na beti ɔbu bete-mi.

Na ndubɔsu kɔlɔ kɔni na katɔ ku kada kakɛ bekyuli nnini, ‘Bɛnyonu mina bebi bananabi ku belekubi na benwini basi kalɔ ɔgyu ɔgyu mmɔ bebo. Ɔsika mina bekyuli na badi, na lídie-ma kalɛ na beti ɔbu bete mina lɛnyi.’

“Ami nékulo kuƒi lɛ́va ɛpu bonwu ɔmmɔ kemmo. Ami kani nédie bekpone badi ulu na báta básia-mii kama na belie bapɔnkɔ lɛlɔ ku kɛɛkɛ kemmo. Nsu ɔƒaani ni, bana ƒui békpi ɔni na bɔsɔ bɔta buuubo ɔdi lɛlɔ. Na bélieku asogya ɔni kabuli mɔɔda na báni-ka bédie-nwu kemmo kɔnakunwi.

Ami ndi Unwoti bina Katɔti Kedee ɔni nédie Israel na ndi-nwu ɔga.