Popular Bible Verses from Petro 1 1

Share

Bɛya na bɔgya Katɔti ɔni ndi Blɔti Yesu Kristo Ɔti enu. Ka Katɔti ɔɔnu-bu kɔnyana geen ɔsu ni, ɔ́ya na bɔdubulie ngba bɔwɔdi na kɔyu kemmo, ɔsika ɔ́gyila Yesu Kristo ɔ́lɛku kekpine. Anwuɔsu na bubo lɛnunsia lɛni naaayii udu kudii. Na bɔɔnu anumi ka bɔdubɔdi ala ani na Katɔti ɔ́klibi úse na katɔ, na adi ala ani neeebie na alanyi taakpi iye ayii udu lɛnɔ.

Lɛlɔ litaayɔ-mii na ɔmɛni lɛlɔ ina ka bɛdubo abi buteebo uwi uwi na bekpoku-mii lɛnɔ. Ala ani ndubɔsiaku-mii ndubɔtina kalɛ na bɛ́ƒɔ bɛ́di geen. Sika ugyiedi ɔni muubie muedi ni, ogya kemmo na beeti-nwu taakya taanu-nwu taati kalɛ na ɔdia. Anwuɔsu bina bɔƒɔtaadi bɔni náƒɔ kuye butulo sika ugyiedi ɔmɛni ni, ɔlɛka bakɔku-mu banu asa na bɔkana bunye kpakplaa. Na si bina bɔƒɔtaadi bɔmmɔ bɔ́kana na búnye ni, Katɔti ɔdubumwi-mii na ɔtalaku-mii katɔ, na ɔbu-mii na Yesu bɔsɔ bubo limeyi lɛmmɔ lɛlɔ.

Na aani kalɛ na Katɔti ɔni nálɔ-mii use kedee ni, amii lɛnɔ bɛbla lɛlɔ kedee na bina ablala ƒui kemmo. Na Bunweni Kedee Ɔku kemmo ni, bénweni ka Katɔti ɔ́su nwuna bekyuli ɔnini, “Bɛbla lɛlɔ kedee, ɔsika ami nse kedee.”

Binu Katɔti litemi, na bɛda udu ukpidi ɔni kemmo na bɛ́kya uwi ɔni na bítenwini tɔ baƒɔtaadine mmɔ bɛya.

Anwuɔsu ni, bɛda lɛlɔ bise bite kabla. Na binye kagyumana na bitaanu ulu teete lɛbuni lɛni na Katɔti ɔdubɔbla ute-mii lɛlɔ uwi ɔni na Yesu wasɔ webo wabaƒɔ-mii ngba.

Na aani kalɛ na Bunweni Kedee Ɔku ɔmmɔ ɔɔsu ɔnii, “Bekyuli ƒui bese aani lɛku kemmo alakpi, na ukyuli bɔdia buse aani alakpi anwula. Alakpi aayɛyɛ na anwula aanú. Nsu Katɔti litemi ani lise lite uwi ƒui.” Na ɔmɛni ndi litemi buni lɛni lɛsa na bákɔ béte-mii.