Popular Bible Verses from Korintoƒuɔ 1 12

Share

Litela lɛni na ɔdi biala ubo ni, Katɔti Kɔyu néte-nwu litela lɛmmɔ kalɛ na bekyuli ƒui bakɛ-nwu lɛlɔ kɔsia.

Anwuɔsu bina ƒui násala bɛ́bla Kristo ɔlɔna ugyii ɔmmɔ na bɛdi-nwu lɛlɔ ekpo unwi unwi.

Na si lɛlɔ kakɛ kadi kakya lɛbibo kemmo ni, ɔlɔna ugyii ɔmmɔ ƒui uunú ɔlɛ na lɛlɔ ekpo akladi lɛnɔ eebó abi. Na si beemwi kakɛ kadi ni, lɛlɔ ekpo ana ƒui aakɛ́ ebiti ammɔ.

Ɔdi anwu ni, Katɔti Kɔyu kúte-nwu litela lɛni náya na ɔti butemi ku lɛnunda ɔkɛnku Kɔyu kɔmmɔ lɛlɔ. Na ɔdi lɛnɔ ni, Kɔyu kɔmmɔ kúte-nwu litela lɛni náya na ɔti butemi ku lɛlati ɔkɛnku Kɔyu kɔmmɔ kani lɛlɔ. Na ɔbambadi ubo bɔƒɔtaadi ɔkɛnku Kɔyu kɔmmɔ kani lɛlɔ. Na ɔdi ni, ubo litela lɛni na uti ɔbwi ɔlɛ ɔkɛnku Kɔyu kɔmmɔ kani lɛlɔ. Ukyuli bamba ni, ɔɔkana na ɔɔbla akɔla budie taatina. Na ɔdi ni, kalɛ na ɔsu Katɔti litemi. Na ɔbambadi ni, ayu lidu bɔnu taati. Na ɔdi ni, adi lidu bɔtɛmi. Na ɔbambadi ni, adi lidu kalɔ budie.

Ala amɛni ƒui ni, adi Katɔti Kɔyu kunwi kɔmmɔ ablala. Na kuule ala ammɔ teete ɔdi biala kalɛ kani na kɔɔyɔ́.

Ɔmɛni ɔsu bule bɔdi buuubo lɛlɔ ekpo ntɛ. Mmomu ekpo ƒui adanku kɔsia ete lɛlɔ.

Katɔti Kɔyu kuute etela pii, nsu Kɔyu kunwi kɔmmɔ kani na kɔdi. Lilu pii lɛkya na bɔɔbla kabla teete Katɔti, nsu Katɔti unwi ɔmmɔ kani na ɔdi. Na kabla lidu lidu lɛnɔ lɛkya, nsu Katɔti unwi ɔmmɔ kani mɔɔtina ɔdi biala nwuna kabla.

Na baƒɔtaadine lɛkpa kemmo ni, Katɔti úti bula ƒui úse ekpo ani námanku-bu. Udeedi ni, batalane. Na unyɔdi ni, kenye bediene. Na ɔtɛdi ni, ala batinane, asa na bani mɔɔbla akɔla budie taatina. Na bani mbo ɔyikun ɔni na babwi lɛlɛ iye bebunku bekyuli iye banu kabla lɛlɔ iye batɛmi adi lidu lidu lɛnɔ basia-ma kama.

Ɔsika ɔlɔna ɔmmɔ ɔlati ni, ɔɔɔdi lɛlakpa linwi kani na lɛdi. Mmomu lɛlɔ ekpo pii násala ɔ́bla-nwu unwi.

Lɛlɔ ekpo ani nse kpɛtɛ kpɛtɛ ntulo ni, anya mmomu na si eeebo-bu lɛlɔ na bulakana lɛla lɛdi bɔbla.

Na si ɔlɔna ɔmmɔ ƒui ɔdi lɛnumi kani ni, dɛ na wabla asa na wenu lɛla lɛdi? Na si kɔtu lɛti lɛnɔ na ɔdi ni, dɛ na wabla asa na wenu ɔnyi? Nsu si bɔ́sia anumi ni, bɔdubɔnu ka Katɔti úti lɛlɔ ekpo bun bun ɔ́bla ɔlɔna umodi ɔmmɔ kalɛ na anwu ɔlati ɔɔyɔ́ ka use. Lɛlɔ ugyii ɔdi uuubo si ɔna ƒui ɔdi likpo linwi!