Popular Bible Verses from I-Roma 6

Share

Isonga say sobadit ni basol, patey ingkatod ingka, nem ẃaray dibshin i‐akan nen Apo Shiyos so nonta ira ẃara son Cristo Jesus ja Apo tayo; si‐kato sota biyag ja enshiy to engintegan.

Nemnem jo ey enshiy pesing ni basol son si‐kayo, ta say kasesaad jo niman, ẃara kayo ma son Apo Shiyos ja kinaasi‐an shakejo; isonga sota kaysedakan tayo ket eg maybetay nodta pengonod tayo nonta bilin ja nay‐awat nonta bayag da.

Sota inpanbonjag tayo, say kay‐eshigan to, singa etey kiton nayda‐kam so nen Cristo ja naybeka. Jet say sakey pay ja kay‐eshigan ni inpanbonjag tayo, singa nayda‐kam kito so nen Cristo nonta inpanbiyag so nen Apo Shiyos maypangkep ni panakabalin to, say mebado‐an ngoy biyag tayo niman na ẃara kitod biyag.

karejo itolok shorog i bakdang jon mandeka ni ngaaw wa aramid, no diket say dag‐en jo koma, itodok jon osalen shakejo nen Apo Shiyos ja mansilbi met laeng son si‐kato ni pandeka ni mapteng. Ta si Apo Shiyos i engi‐kan ni biyag son si‐kayo nonta singa etey kayo.

Amta tayo met ey sota sigod ja ogadi tayo nonta eg kito pay laeng emati ket singa ekilansa sotan na ogadi so nen Cristo shi koros, say sotan na ngaaw wa aramid ni bakdang tayo, mesa‐datan, jet aliẃen sota basol ma i ontengel son si‐katejo.

Isonga angken si‐kayo, ibidang jo ngoy bakdang jo shorog ey etey kayo da ja enshiy jo kaybiyangan ni basol, nem nemnem jo ngo ey ebiyag kayo met laeng para sota kayshedjawan nen Apo Shiyos maypangkep ni pamatiyo so nen Cristo Jesus.

Jet sotan den inkowan ko, baka ikowan jo et ey mapteng no itoltoloy tayon manbesol, ta no onba‐ba‐deg i basol, ma‐ma‐shoman i kaasi nen Apo Shiyos. Nem enshi! Araẃi itan na nemnem. Say agpayso, enshi may bibiyang tayon manbesol ja inges to sota etey ja eg ma manbesol.

Amtayo met ey no ngantoy naydowaman jon dag‐en, sotan i singa enanngel son si‐kayo. Isonga no naydowam kayon manbesol, singa sotan i enanngel son si‐kayo. Jet say panpa‐no‐an ni joka panbesbesol, patey ja enshiy to engintegan. Nem no naydowam kayon memati son Apo Shiyos, say panbenagan jo, eẃaten shakejo nen Apo Shiyos jet maybidang kayo ma ey enshiy basol jo.

Nontan da, naydowam kayon manbesol, nem niman, man‐iyaman kito so nen Apo Shiyos, ta say pinatiyon nay‐edet shi poso jo ma, sota koston toro, jet si‐kato may joka on‐onora ni olay. Jet niman ma, enshiy pesing ni basol ja menngel son si‐kayo, ta say singa nanngel son si‐kayo niman, naydowam kayon mandeka ni piyan nen Apo Shiyos.