Popular Bible Verses from ISAÍAS 43

Share

Ñoqan mosoqkaqta ruwashani, rikhurishanñan, ¿manachu reparankichis? Ñantan ch'inneqpi kichashani, mayukunatapas purun pampapi purichishani

Unuta chimpaqtiykipas, ñoqaqa qanwanmi kasaq, mayunta chimpaqtiykipas, manan mayuqa millp'usunkichu. Nina ukhunta puriqtiykipas, manan ruphasunkichu, manan ninaqa imanasunkipaschu.

Chaywanpas amaña unay p'unchayta yuyariychischu, amaña ñawpata rimashaychischu.

Jacobpa miraynin Israel llaqta, kamaqniyki Señor Diosmi nisunki: Ama manchakuychu, ñoqan kacharichimurqayki, sutiykimantan waqyamurqayki, ñoqapaqmi qanqa kanki.

Ñoqapaqqa ancha chaniyoqmi kanki, ñoqan munakuyki hatunchaykuyki, chaymi kacharisqa kanaykipaq runakunata pagani, qespichisqa kanaykipaq hatun suyukunata pagani.

Ñoqan Apu Señor Diosniyki kani, Israelpa Ch'uya Diosninmi kani, Qespichiqniykin kani. Qanta kacharichinaypaqqa Egipto suyutan pagani, rantiykipiqa Etiopía suyutan Seba suyutawan qoni.

Ama manchakuychu, ñoqaqa qanwanmi kashani, inti lloqsimuymantan mirayniykita pusamusaq, inti haykuymantataq hoqarimusqayki.

Ichaqa, Ñoqan kashani, ñoqaraykun huchallikusqaykikunata pichani, manañataqmi huchaykikunata yuyarisaqchu.

Israel llaqtalláy, testigoykunan qankunaqa kankichis, akllakusqay kamachiykunan kankichis, reqsiwanaykichispaq iñiwanaykichispaq, Diospuni kasqaytapas yachanaykichispaq. Ñoqallapunin Diosqa kani, manan hayk'aqpas wak diosqa karqanchu.

Ñoqallapunin Señorqa kani, ñoqallapunin qespichiqpas kani

Manataqmi pipas makiymanta qechuqqa kanchu, manan pipas ñoqaq imapas ruwasqaytaqa qolluchiyta atinmanchu, nispa.

akllakusqay llaqtaman ukyachinaypaq. Ch'inneqpin unuta phullpuchishani, purun pampapin mayukunata purichishani, chaymi campo salqa uywakunapas chacal nisqa animalkunapas surikunapas yupaychamuwanqaku. Kay llaqtataqa ñoqapaqmi kamakurqani, yupaychaykunatan takipuwanqa.

Wichaytan nisaq: Paykunata kutichimuy, nispa, uraytataq nisaq: Ama hark'amuychu, nispa. Churiykuna karumanta hampuchun, ususiykunapas kay pachaq karunmanta kutimpuchun. Paykunaqa ñoqaq llaqtaymi, paykunataqa hatunchawanankupaqmi kamarqani, nispa.

Señor Diosmi llaqtanta nin: Unayñan mama qochapi ñanta kicharqani, manchana unupi purinata kicharqani, kallpasapa ejercitontan qatimurqani carretakunantinta caballokunantinta, kuskallan manaña sayarinankupaq urmaykurqanku, wañupuq mecha hinan tukukurqanku.

Ñoqan Señorqa kani, Ch'uya Diosniykichis, ñoqan Israelpa Kamaqen kani, Reyniykichis, nispa.