Popular Bible Verses from looma 1

Share

o'ate'o h'oinveni 'e fukuin; 'e fukuin zou meoino tonʉ to hamo. tesi to'usni namo afu'u tmaa'uzo ci cou. aueva 'e couyutaya . atavei 'o couyafana.

maica 'e fukuin eni isi paavi 'o hamo tesi yainenu 'e cou nate hia meelʉ yupa toseolʉ na natʉ'ca: mo i'hoi no tmaa'uzo, ac'ʉhʉ no tmaa'uzo. aʉlʉ mais'a 'o isi yainca to seiso: <'omo i'mi no tmaa'uzo ho yupa toseolʉ na natʉ'ca to hamo te elʉ no nsou.>

'ola o'te peelʉi aiti ci yu'ausna to hamo, 'ai'oeno 'auesiesi ci tonʉ ho i'o yu'ausnasi, a'ʉmtʉsi isicu ahoza ho ohon'a teyai 'e hpʉhpʉngʉ hocu teolʉi, te i'mi ta ohsila teyai ci acʉcʉhʉ ho honga. ko'koeno 'e cou uk'acite peelʉi 'o'emamzi.

lahe e'vono cohivi ta cou 'o hamo, at'inghi o'a lahe faeni to hamo na psoevohngʉ, maezo o'ala to'aveoveoyʉ to hamo; la ma'loʉngʉ 'o koyuhe, voecʉvcʉ 'o 'tohʉngʉ.

ihe ciha 'o so'emio to hamo, tiouhe tola ma'ankʉ; la m'ohkuyu to ohoc'o teyai ci macucuma, ho o'te p'ohkui 'o moso mooyai ci nooe'oca - nte 'auesiesia tohmomoengʉneni, 'aamen!

'e 'oha einu ho 'oha peislʉlʉ ta cou cu feʉ'sa 'o so'emio, 'o hamo micu i'mi ne pepe ho pa'teni na sʉ'nosi.

i'mi homo maicac'o, 'o hamo lasi mooeza poa fiho no 'aʉnpʉnpʉ ci ma'cac'ouhe; 'o maamespingi la peispuyu to ʉmnʉ ci yu'ausna no yup'ouso ho peʉezi to 'aʉnpʉnpʉ ci yup'ouso. maezoc'o 'o haahocngʉ lahe teongasi 'o ʉmnʉ ci yu'ausna no yup'ouso 'o mamespingi, yupa poot'ou to poc'ou ci 'tohʉngʉ, 'o hahocngʉ ho hahocngʉ mioc'o totiski ho peis'usnu to isi h'oinveni ci hi'hioa, atavei m'elʉ note anana'va elʉa tamo peiskuzkuzo ci patvovei. homoeno ma'unano o'ate nama 'ahʉyʉ ebobohngʉ to hamo 'e cou, isi moeza ieni no 'tohʉngʉhe to hamo ho poa yaa kuzo ci 'tohʉngʉ, hioa 'o o'ante hioa ci hi'hioa.

la ma'unano mo iachi mau'to'tohʉngʉ, a'ʉmtʉsi mo nongonongo. o'a lahe p'ohkui 'o 'auesiesi yaansou ci hamo, namala auyu m'ohkuyu to uacoua, 'ai'oisieno ho teoteai poa mi'u'usnu to te mcoi ci cou, zomʉ, yuansou, mayoyoi.