Popular Bible Verses from Efesus 2

Share

Kita hii nipajadi nu Alatala manusia nabaru anu nosangu rara nte i Yesus Kristus. Patuju nu Alatala novia ivehaitu ala kita mompakule mokainggu mabelo, mpo nipakatantuNa mami ka kita lako ri nggauluname.

Lako ri pomparasayamiu i Kristus, komiu nipakasalama sabana kabelo rara nu Alatala. Haitu ledo asele pompasimbukumiu mboto tapi pedekei nu Alatala bayangi. Kita nipakasalama ledo sabana pompasimbukuta mboto ala ledo maria tona mangoe manguli, “Yaku hii nipakasalama sabana pompasimbukuku mboto!”

Tapi Alatala naasi mpuu mataNa nanggita kita. Naoge mpuu toveNa anu nipopelabiNa ka kita. Tempo kita da nireke namate sabana ledo natundu nte Ia, Ia nompakatuvu mpanjili kita nosanggani-nggani ante i Kristus. Toramo! Komiu nipakasalama sabana kabelo rara nu Alatala!

Bo kita nianggatakaNa ala kita muni momparenta mosanggani-nggani ante i Yesus Kristus ri suruga sabana kita nosangu rara ante Ia.

Jadi, sampesuvu-sampesuvu ledo toYahudi, bara ipia komiu aga nireke ntona tosangatana, bo ledo todea nu Alatala. Tapi sii-sii domo ivesia. Sii-sii komiu nosamporoa nte todea nu Alatala. Komiu najadi nosambanua ante pura-pura ana-ana nu Alatala. Kita topomparasaya i Kristus nirapaka gana-gana nu banua nibangu nu Alatala. Suro-suro i Kristus bo nabi-nabi nirapaka pandasi nu banua haitu. I Yesus Kristus nirapaka vatu nu pandasi anu nelabi nopoko.