Popular Bible Verses from Kòjoɖotɔwo 7

Share

Tɔhonɔ̀ gblɔ̃ na Gideɔ̀n be: “Àhùakɔ̃ wòa sùgbɔ ŋutɔ, ne ma do Madìantɔwo àsi na wò. Izràɛlviwo la va susu be yèwo be ŋusɛ̃ ye na yèwo ɖùji eye wo la sɔ gogo kè nyi tɔ̀ nyèa sɔ wɔ̀ woa tɔ̀.”

Tɔhonɔ̀ gblɔ̃ na Gideɔ̀n be: “Ɛ̃ɛ mù la hlùɛ̃ mì to àmè àlɔ̀ ètɔ̃ kèawo ji eye mù la ɖè Madìan-tɔwo do àsi na wò. Na àmè kpɔ̀tɛawo nɔ trɔ yì woabe àxuewo mè.”

Ɖo ekèa ŋuti a, gblɔ̃ na àhùakɔ̃a be: “àmè kèwo keŋu vɔ̃vɔ̃ le ɖo eye wo le hũhũawo nɔ trɔ to Gilead be ètoa ji ne woa yì woa de.” Àmè hotu woeɖèka (22000) trɔ lè àhùakɔ̃a ŋuti zè ɖèka eye e kpɔ̀tɔ̀ àmè hotu àtɔ̃ (10000).

Co Tɔhonɔ̀ gblɔ̃ na Gideɔ̀n be: “Àhùakɔ̃ wòa gbà sùgbɔ ŋutɔ. Kplɔ̀ wo yì ètɔ̀ to, ne ma cã woa mè na wò. Mù la ɖè àmè kè ɖo la kplɔ̀ wò do a, kudo àmè kè mu ɖo la kplɔ̀ wò do òa, fiɔ wò.”

Gideɔ̀n kplɔ̀ yebe àhùakɔ̃a yì ètɔ̀a to. Eye Tɔhonɔ̀ gblɔ̃ na ɛ̀ be: “Ɖè àmè kèwo la sɔ àlɔ̀ èvèawo kù èsìa, la ɖiɖɔ ɛ̀ ku àɖe sìgbè àlekè àvũ ɖiɖɔna èsì nènea ɖovò. Eye àmè kèwo la jèklò, la do ènu èsìa mè la nù ìawo cã, ɖovò.” Àmè kèwo sɔ àlɔ̀ èvè kù èsìa, ɖiɖɔ ɛ̀ sìgbè àvũ nènea, be hɛ̃hlɛ̃ mè lè àlɔ̀ ètɔ̃. Àmè kpɔ̀tɛawo kpata jè èklò, nù èsìa.