Popular Bible Verses from KÛGWÛRÎRWA 13

Share

Ûtitaûra rwano rûru ûtarî mwe ûûme. Ûra mûûgî nacerie amenye kîra namba înu îrûngamîîrîîte, n'ûntû namba înu îrûngamîîrîîte riîtwa rîa muntû. Namba înu i magana mathanthatû ma mîrongo îthanthatû na ithanthatû (666).

Antû bonthe bamîgonga bara baatûîre nthîgûrû, bara mariîtwa maao mataandîkwa îbukuuni rîa mwoyo mbere ya nthîgûrû yûmbwa. Îbuku rîru rîa mwoyo, i rîra rîa Kagondu kara kaûragirwe.

Nyamû înu yeekîrithia antû bonthe rwano njara ya ûrîo kana ûthiû, baanene na baaniini, itonga na nkîa, nkombo na bara batarî nkombo. Gûgûkarîka ûgu, gwatuîka gûtirî muntû akîgûra kana eendia gîntû atarî na rwano rûru. Na rwano rûru i riîtwa rîa nyamû înu kana namba ya riîtwa rîa yo.

“Ûra arî mûtagwa, nagaataîgwa. Ûra arî mûûragwa na rûyiû, nakaûragwa na ru. Ûgu i ta kwonania, bara ûkeegua barî antû ba Ngai bakeendekana beegua barî na kûûmîîria na wîtîgio.”

Ndacooka ndoona nyamû yatiibûka îriani. Nyamû înu yarî na ngoci îkûmi, na wakîra rûgoci irweekîrîtwe nthûmbî ya ûnene. Na yarî na biongo mûgwanja. Na wakîra kîongo kîandîkîîtwe riîtwa rîa kûruma Ngai.

Yeewa watho bwa kûrûa na antû ba Ngai îkaboota, inya ya kwatha mîgongo yonthe, antû ba rangi cionthe, nthiomi cionthe, na nthîgûrû cionthe.

Yeeneeria antû ba nthîgûrû na biama bibu yaringaga kuumania na inya îra yeetwe i nyamû înu îngî îmîringîîra bio. Yeera antû nwa mwanka barûthe mûbuanaano wa nyamû înu yamuntîîtwe kîongo kîmwe na rûyiû, gîakua, îndî gîacooka kîabua. Yeewa inya ya gwîkîra mûbuanaano ûyu mwoyo. Mûbuanaano ûyu watua kwaria na ûkîûraga bara bataugonga.

Nyamû înu ndoonire yakari ta ngo. Yarî na mathu maakari ta ma ndû, na kanyua gaakari ta ga cimba. Njoka înu yarî nene ûgu yanenkera nyamû înu inya ya yo, gîtî kîa yo kîa ûnene, na inya înene mûno ya wathani.

Nyamû înu yeewa watho bwa kwaria mîgambo îmîthûûku mûno ya kûrumanga Ngai. Yeetîgîîrua mîeri mîrongo îna na îîrî îrûtha wabûra îkwenda.

Kîongo kîmwe kîa nyamû înu gîakari taka kîarî kîîmunte bwa kûrigaria, gîakua kûrû, îndî îmuntîrwa rîru rîora, kîongo kîabua kaîrî. Kîrîndî kîa nthîgûrû yonthe kîarigarua i nyamû înu, gîatuîka athingati ba yo.

Ndoona nyamû îngî yatiibûka nthîgûrû. Yarî na ngoci ciîrî ta cia gatûrûme, na kayû ka yo keeguîkaga ta ka njoka îra nene mûno. Yatûmagîra inya ya nyamû îra ya mbere, îgatûma antû ba nthîgûrû bagonga nyamû înu ya mbere, îra yarî na kîronda kîra.