Popular Bible Verses from AIBIRANIA 11

Share

Kwîgua tûrî na wîtîgio i kwîgua tûrî na mma ya mantû mara twîrîgîîrîîte, kwîgua twiyî ûntû bûra tûtoona bûrî oogo, tûtarî na nkanja. Wîtîgio bwa antû ba tene mûno, i bu bwatûmire Ngai akena i bo.

Gûtarî wîtîgio gûtirî we akenia Ngai. Muntû wonthe ûra aayaga kîrî Ngai nwa mwanka eetîgie Ngai natûîre mwoyo na nathaarimaga bara bamûcûaga na mantû meega.

Wîtîgio i bu bûtûmaga tûmenya into bionthe biaûmbirwe kuumania na kiugo kîrî Ngai. Kwoogu bira twonaga biaûmbirwe kuuma kîrî bira bitoonekana na meetho.

I wîtîgio bwatûmire Îburaîmu aathîkîra Ngai, rîra Ngai aamwîrire aume nthîgûrû yao athi nthîgûrû îngî îra aamwîrire akamwaa îtuîke yake. Îburaîmu aathiire atakûmenya kûra aathiîte. I wîtîgio bwatûmire atûûra ûgeniini gûntû kûra Ngai aamwîrîîte bûrî wîrane. Aatûûraga maremaani barî na Isaka na Njakubu, bara wana bo beerwe wîrane bûmwe n'we i Ngai.

I wîtîgio bwatûmire Nuu aaka cabina îra yoonokiirie antû ba mûciî wake. Nuu neetîgiirie Ngai akûmwîra mantû matoonekanîîte mbereeni. Kuumania na wîtîgio bwake, Nuu aareganire na mantû ma nthîgûrû, aatuîka ûmwagîru kîrî Ngai n'ûntû bwa wîtîgio.

I wîtîgio bwatûmire Enoki athûkua i Ngai kaingo atakua. Gûtaarî muntû akîmenya ara aarî n'ûntû Ngai naarî akûmûthûkia. Mbere ya atirathûkua, *Maandîko Maatheru maugaga aarî muntû aakeniirie Ngai.

I wîtîgio bwatûmire Abeeri arutîra Ngai kîgongwana kîega nkûrûki ya gîa Kaini. Wîtîgio bwake i bu bwatûmire Ngai akena n'we, amûthûkia arî muntû ûmwagîru na aakena n'into bira aamûrutîîre. Na wana kinya ûkeegua n'ûmûkuû, kûringana na wîtîgio bwake i taka aaragia.

I wîtîgio bwatûmire Saara agîa nda ya Îburaîmu, aciara, wana kinya ûkeegua naarî agûtindira. Îburaîmu neetîgîîtie Ngai akaingia wîrane bwake.

Îburaîmu aarûthire ûgu n'ûntû bwa bûra eeteereete taûni îbanganîîtue na yakwa i Ngai mûcingiini ûmûkamu.

I wîtîgio bwatûmire Musa agûkûra arega gwîtwa mwana wa mwarî wa mûnene wa Miisiri. Musa oonire i kaaba akanyamaaranîria amwe na antû ba Ngai, bantû a kwîgua mûrîo wa kagiita gaakai wa meeyia. Oonire i kaaba akanyaamaara n'ûntû bwa kwîrîgîîra Kîrîstû ûra aayîîte, kîrî kwîgua arî na ûtonga bwa Miisiri bunthe. Na gîtûmi i kwîgua neeteereete kwewa kîewa. I wîtîgio bwatûmire Musa auma Miisiri, na ataakuthûkaga mûthûûro wa mûnene. Aakarire arikîîtie wîtîgio bwake taka oonaga Ngai ûra atoonagwa.

I wîtîgio bwatûmire Îburaîmu aruta mwana wake Isaka arî kîgongwana, rîra Ngai aamûgeriirie. N'we Ngai eere mawîrane na amwîra, “N'Isaka aagûtûma ûgîa nciarwa.” Na amwe na ûgu neetîgagîîria kûruta Isaka ûra aarî mwana wake wenka, atuîka kîgongwana.

I wîtîgio bwatûmire Raabu, mûka ûra aarî îrwaya, agwata ûgeni Aisiraeri bara athigaani. Na kwoogu ataakua antû bara bangî ba taûni înu bagîkua, bara bateetîgîîtie Ngai.

I wîtîgio bwatûmire Aisiraeri baringa Îria Rîtûûne bathiîrîîte nthî îmbûmo. Îndî Amiisiri bagûcûûgia kûringa ta bo, ibaûrîîre ku.

I wîtîgio bwatûmire nthingo cia Njeriko ciomokanga Aisiraeri bagûcithiûrûûka ntugû mûgwanja.

I wîtîgio bwatûmire eera Aisiraeri barîe kîatho gîa *Pasaka na baake nthakame itugîîni bia mîrango, kaingo mûraika ûra aûragaga aana ba mbere ba antû na ba nyamû, ataûraga baao.

I wîtîgio bwatûmire Njosebu, rîra aarî akubî gûkua agwetera Aisiraeri abeera bakauma ûkombooni Miisiri. Aabeerire aakua bakamate maîndî maake.

I wîtîgio bwatûmire Njakubu, rîra aarî akubî gûkua, athaarima aana bara baîrî ba Njosebu. Na aacooka aakumia Ngai eeteetheereetie kûrûngama na kamûraagi gaake kara eekongootagia na ko.

I wîtîgio bwatûmire Isaka athaarima aana baake, Njakubu na Esaû, mantûûni ma ntugû ciao ira ciarî ikaaya.