Popular Bible Verses from Isaias 9

Share

Ang isa ka bata matawo sa aton! Ang isa ka anak nga lalaki ginhatag sa aton! Kag sia ang aton manginpangulo. Pagatawgon sia, “Maalam nga Manuglaygay,” “Gamhanan nga Dios,” “Amay nga wala sing Katubtoban,” “Prinsipe sang Paghidait.”

Ang mga tawo nga nagalakat sa kadudulman nakakita sing daku nga kapawa. Nagaestar sila sa duta sang mga landong, pero karon ang kapawa nagasilak sa ila.

Ang iya harianon nga gahom magadugang, ang iya ginharian malinong sa gihapon. Sia ang magapanubli sang trono ni Haring David, magagahom sia sa katarungan kag sa pagkamatarong, halin karon tubtob sa katubtoban. Ang GINOO sang mga hangaway, nagpat-od nga magahimo sini tanan.

Ang mga botas sang nagpanggubat nga mga hangaway, kag ang tanan nila nga mga bayu nga nabulit sang dugo pagasunogon sa kalayo.

Wala sila sing palagyuhan sining tion sang kagamo. Ang kadutaan sang mga tribo ni Zabulon kag ni Neftali sang una ginpakahuy-an, pero ang palaabuton magadala sang kadungganan sa sini nga kadutaan halin sa Mediteraneo, pakadto sa sidlangan sa duta sa tabok sang Jordan, pa Galilea, sa diin nagaestar ang mga dumoluong.

O Ginoo, ginhatagan mo sila sing daku nga kalipay, ginhimo mo nga magmalipayon sila. Magahugyaw sila sa imo ginhimo, subong sang paghinugyaw sang mga tawo nga nagaani, ukon sang mga tawo nga nagapartida sang inagaw nga mga manggad.

Kay ginbali mo ang gota nga nagapabug-at sa ila kag ang baston nga naghanot sang ila mga abaga. Ikaw ang naglutos sang pungsod nga nagpigos kag nagpamintaha sang imo mga tawo, subong sang imo paglutos sadto anay sang mga hangaway sang Midian.