Popular Bible Verses from 1 Pedro 4

Share

Labaw sa tanan, maghigugmaanay kamo sing tudok sa tagipusoon, tungod kay ang paghigugma nagatabon sang madamo nga mga sala.

Subong maayo nga manugdumala sang nagakalainlain nga mga hiyas sang Dios, ang tagsatagsa dapat maggamit sang iya pinasahi nga hiyas nga nabaton halin sa Dios para sa kaayuhan sang iban.

Ang bisan sin-o nga nagawali, dapat magwali sang pulong sang Dios. Ang bisan sin-o nga nagaalagad, dapat mag-alagad suno sa ikasarang nga ginhatag sang Dios sa iya, agod nga sa tanan nga bagay mahatag sa Dios ang pagdayaw paagi kay Jesu-Cristo, nga sa iya ang kadungganan kag gahom sa wala sing katapusan! Kabay pa.

Pero kon nagaantos kamo tungod kay Cristohanon kamo, indi kamo magkahuya sini, kundi magpasalamat kamo sa Dios nga inyo ginadala ang ngalan ni Cristo.

Malapit na ang katapusan sang tanan nga mga butang. Kinahanglan nga magpugong kamo sang inyo kaugalingon kag magmabinantayon, agod makapangamuyo kamo.

Mga hinigugma ko, indi kamo magkatingala sa mapait nga pagtilaw nga inyo ginaantos, subong nga daw tumalagsahon nga hitabo ini para sa inyo. Sa baylo, magkalipay kamo, kay nagapakig-ambit kamo sa mga pag-antos ni Cristo, agod nga mapuno kamo sing kalipay kon ang iya diosnon nga pagkahalangdon ipahayag.

Batuna ang isa kag isa sa inyo mga balay, nga wala nagakulomuron.

Gani, ang mga nagaantos tungod kay amo ini ang kabubot-on sang Dios para sa ila, paagi sa ila maayo nga mga buhat dapat magtugyan sing bug-os sang ila kaugalingon sa ila Manunuga, nga nagatuman gihapon sang iya saad.

Tungod sang lawasnon nga pag-antos ni Cristo, dapat kamo man magpalig-on sang inyo kaugalingon sa amo man nga panghunahuna. Kay ang bisan sin-o nga nagaantos sa iya lawas wala na nagapakasala. Gani, sugod karon tubtob mapatay kamo, magkabuhi kamo nga ginagamhan sang kabubot-on sang Dios kag indi sa inyo tawhanon nga mga kailigbon.

Malipayon kamo kon ginapakahuy-an kamo tungod kay mga sumolunod kamo ni Cristo, kay ini nagakahulogan nga ang gamhanan nga Espiritu, ang Espiritu sang Dios, yara sa inyo.