Popular Bible Verses from Ēfeto 4

Share

E ai kōrua he nuꞌu riva, māhatu ꞌaroha, ꞌite i te haka rehu i te meꞌe taꞌe tano aŋa atu e te rua, pa he haka rehu iŋa era e te ꞌAtua i te kōrua hara hai Ietū Kiritō.

ꞌIna ko manaꞌu i hau rō atu kōrua ki te rua, ꞌina ko ꞌōhumu, ꞌina ko riri tahaŋa, ꞌe e ꞌite kōrua mo haꞌaoromaꞌi hai haŋa i te rua.

ꞌIna ko parauꞌino ꞌe ꞌina ko kī i te vānaŋa mo taꞌe au o te rua. Te meꞌe mau nō o kōrua mo vānaŋa he meꞌe riva-riva mo hāꞌūꞌū i te rua.

E haka kore mai i a kōrua te ŋā meꞌe nei: he manaꞌu he oho o ruŋa i te meꞌe taꞌe tano aŋa atu e te rua, he hū he riri mo te rua, he tātake, he vā-vā, ꞌe he taꞌatoꞌa nō huru o te meꞌe taꞌe tano aŋa ki te rua.

Mo riri, e uꞌi kōrua ꞌo hara; ꞌe ꞌina ko maꞌu te riri ki te rua mahana, ꞌo ravaꞌa rō i a kōrua e Rukifero mo haka hara.

ꞌO ira, e haka rē te kōrua huru ꞌe te kōrua noho iŋa taꞌe tano o muꞌa ꞌā haka tere e te meꞌe taꞌe tano pohe e te hakari. O te meꞌe ena te reo-reo ꞌe te maꞌu i te taŋata a te ara taꞌe tano. E haka rē mo te Vārua Maitai e haka ꞌāpī atu i te kōrua manaꞌu. Te meꞌe mo takeꞌa ꞌi ruŋa i a kōrua he huru ꞌe he noho iŋa ꞌāpī tano ki te huru ꞌāpī vaꞌai atu e te ꞌAtua, pa he huru mau era ꞌā ōꞌona. Te noho iŋa nei he noho iŋa tī-tika, tano ki te mata o te ꞌAtua, ꞌina e tahi hape.

A kōrua, paꞌi, e tahi nō manaꞌu hai ⌊Vārua Maitai⌋; ꞌo ira, e ai te haumārū ꞌi roto i a kōrua ꞌo topa kē-kē rō kōrua.

ꞌE ꞌāꞌana mau ꞌā i haꞌataꞌa, mai roto i te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū, i te nuꞌu ki a rāua i vaꞌai ai i tōꞌona pūai mo aŋa i te aŋa o te ꞌAtua, kē pa he ⌊ꞌāpōtoro⌋, kē pa he taŋata vānaŋa i te meꞌe haka ꞌite e te ꞌAtua ki a ia, kē pa he maꞌori haka ꞌite oho i te ⌊roŋo riva-riva o te ꞌAtua⌋, ꞌe kē pa he taŋata hāpaꞌo ꞌe hāpī i te taina. I aŋa ai a Ietū i te meꞌe nei mo hāpī ꞌe mo haka riva-riva o te nuꞌu nei i a tātou i te nuꞌu taꞌatoꞌa haꞌataꞌa e te ꞌAtua māꞌana, ki tano tahi ai a tātou mo aŋa takoꞌa ki a ia. Pē ira ka hio-hio ka oho ena a tātou te nuꞌu taꞌatoꞌa ꞌāꞌana, ꞌātā ka ai rō e tahi mau nō manaꞌu ꞌo te māhani ꞌe ꞌo te haka moe i te manaꞌu ꞌi ruŋa i te Poki o te ꞌAtua. ꞌE pē ira takoꞌa ka paꞌari ka oho ena te tātou manaꞌu o ruŋa i te meꞌe o te ꞌAtua, ꞌātā ka ai rō te tātou huru, huru riva, pa he huru riva o Ietū Kiritō, ꞌina e tahi hape.

E ko ai haka ꞌou ia a tātou pa he ŋā poki e ko roa he huri te manaꞌu ꞌi te haka roŋo ki te hāpī taꞌe he parautiꞌa haka ꞌite e te nuꞌu mārama-rama ꞌite i te reo-reo. E ai rō tātou pa he nuꞌu paꞌari maꞌu hio-hio ꞌe haka ꞌite hai haŋa ki te nuꞌu i te hāpī parautiꞌa o te ꞌAtua, ꞌe te tātou huru e hāhine e oho rō ki te huru riva o Ietū Kiritō, Pūꞌoko o tātou.