Popular Bible Verses from 1 Iovani 4

Share

Te kona ꞌi ira te haŋa, ꞌina he riꞌa-riꞌa. Te taŋata e riꞌa-riꞌa ena ꞌi te manaꞌu he haka ūtuꞌa i a rāua, ꞌe te haŋa parautiꞌa o te ꞌAtua he haka kore i te riꞌa-riꞌa. Te kope riꞌa-riꞌa ia, ꞌina kai aŋi-aŋi riva-riva ꞌā i te pūai o te haŋa o te ꞌAtua mōꞌona.

E ŋā poki, o te ꞌAtua a kōrua, ꞌe ko rē ꞌana ki te ŋā haꞌavare era ꞌo te ai te Vārua ena i a kōrua ꞌata pūai ki te vārua o te ao nei.

A tātou e haŋa nei ꞌo te ai ꞌi raꞌe te ꞌAtua i haŋa mai ai.

E te taina, e haŋa a tātou ki te rua ꞌo te ai te meꞌe he haŋa, mai te ꞌAtua e oho mai ena. Te nuꞌu taꞌatoꞌa haŋa ki te rua he ŋā poki o te ꞌAtua, ꞌe ko māhani ꞌā i a ia.

ꞌE te kope taꞌe haŋa ki te rua, ꞌina he māhani i te ꞌAtua; te ꞌAtua, paꞌi, he haŋa.

Ko te meꞌe nei te meꞌe he haŋa parautiꞌa: he uŋa mai o te ꞌAtua i tāꞌana Poki pa he tūtia mo haka kore o te tātou hara, taꞌe ꞌō ko te haŋa nei o tātou ki a ia.

E te taina, mo ai pē ira te haŋa iŋa mai o te ꞌAtua ki a tātou, e haŋa takoꞌa a tātou ki te rua.

Ko haka takeꞌa mai ꞌana e te ꞌAtua i tōꞌona haŋa hai uŋa mai i tāꞌana Poki mau nō era e tahi ki te ao nei mo ravaꞌa e tātou te ora ꞌāpī ꞌina he hopeꞌa raꞌa hai ia.

Mo kī o te kope e tahi: «E haŋa rō ꞌana a au ki te ꞌAtua» ꞌe ꞌina he haŋa ki tōꞌona taina, he reo-reo e tahi. Te taŋata taꞌe haŋa ki tōꞌona taina, he meꞌe takeꞌa e ia, ¿pē hē ia ana haŋa ki te ꞌAtua, he meꞌe taꞌe takeꞌa e ia?

Te kope kī: a Ietū he Poki o te ꞌAtua, ararua ko te ꞌAtua e noho ena.

He roŋo haka rē mai era nei e Ietū Kiritō: te kope haŋa ki te ꞌAtua e haŋa takoꞌa ki tōꞌona taina.

E te taina, ꞌina kōrua ko manaꞌu he parautiꞌa te vānaŋa o te nuꞌu taꞌatoꞌa kī e vānaŋa ꞌana a rāua i te meꞌe haka vānaŋa e te ꞌAtua. Te meꞌe o kōrua mo aŋa he haka ꞌatu ana ai te vārua era ꞌi roto i a rāua o te ꞌAtua mau ꞌā; e rahi rō ꞌana, paꞌi, te perofeta reo-reo ꞌi te ao. ¿Pē hē a kōrua ana aŋi-aŋi ko ai te kope i a ia te Vārua o te ꞌAtua? He kope nō era mo kī: a Ietū Kiritō pa he taŋata i oho mai ai, i a ia te Vārua o te ꞌAtua.

ꞌE te kope taꞌe kī pē ira o ruŋa i a Ietū, ꞌina i a ia te Vārua o te ꞌAtua; he vārua o te kiritō reo-reo te meꞌe i a ia. A kōrua i ŋaroꞌa rō i te vānaŋa e oho rō mai te vārua ena, ꞌe te parautiꞌa mau, ꞌī a ia ꞌi te ao nei.