Popular Bible Verses from Röm 1

Share

Wïjɑ pɑ lɑ̈ɑ̈y ki pwönyi Wöndøj, mɑ́ e bɑ tegi Jwøk men-ɑ nyi yiel tyëng-ɑ ɑ́yïëy bënn; Yeud ɑ mɑl, bɑng gen dɑ tyëngpɑth ki Yeud.

Mɑ́ Wöndøj nyodh-ɑ kër-ɑ óyieel dhɑnhø, kì bɑng yïëyø ceth. Ni kɑ ógwedii kì yij wɑ̈nyi kwërø kinni, “Tyëngtir óbødh, mɑ́ ge ngɑ̈dh-ɑ Jwøk.”

Gïg-ɑ ɑ́cwɑ̈j yi Jwøk bënn, cɑg kì bøli keny-ɑ ɑ́cwɑ̈je lɑ̈bø, nyodh-ɑ tege geki bëëde ɑ́ Jwøng-ɑ gïti ɑtheer. Jiɑni bong keny-ɑ ókëjji yi gen.

Mɑ́ Jwøk ngɑ̈nyi yi gen, de pɑ lejji yi gen, wɑlɑ̀ pɑ nyi pwøj yi gen. De rummi gen ɑ́ruud, kɑ wɑ̈thi gen, wɑ̈th-ɑ nøg ogöögø ki muudhø.

Kɑ kwøbb-ɑ bɑ dyër kipe Jwøk, wil yi gen ki kwøbbi pyed. Kɑ gïg-ɑ ɑ́cwɑ̈j yi en nyi mɑlli yi gen gɑ jwöggi gen; ge mɑll-ɑ gïg-ɑ ɑ́ceg ki cwɑ̈jø, o ge bɑny gen Ngɑn-ɑ Ácwɑ̈ɑ̈j, eni ngɑn-ɑ lenhi gïti ɑtheer! Amen.

Jwøk owërø kì mɑl, kipe orøg geki rɑj møg-ɑ gøggi yi ji, mɑ́ dyër nyi mɑ̈ɑ̈n ge’ yodø.

Kì bɑng kɑ̀ gøggi gen gïgɑni, Jwøk cinge ɑ́lwɑ̈nge kì ri gen, kɑ ge döng ge gøgg-ɑ gïgrijjø møg-ɑ nyi tyer yi pëthi gen. Kɑ yuu-ɑ nyi niin tyëng-ɑ mɑ̈nn, wil yi mɑ̈nni gen ki men pɑth ki en. Kɑ jøg-ɑ cwøw ówïyø niin ki mɑ̈nn, de ge nɑ̈g yi mɑ̈j kɑ ri gen keti gen; kɑ jɑlø nyi niin yi jɑlø, kɑ ge kɑ̈n-ɑ kömi gen ki cɑ́y mø kyëëw ki döngi orøøg gen. Ge ɑ́wiy ki rɑ̈ji rummi gen yi Jwøk, kipe kɑ ɑ́bɑ̈nyi gen ki mïdhi dïdø men-ɑ kɑ̈ɑ̈l yï Jwøk; ɑpëggi gen be gøggi gïg pɑ di gwøg yi gen.

Ge ɑ́cwølli ri gen gɑ ji mø wɑ̈thi gen pel, kɑ yöd ge ceg-ɑ gwøg ki dhëgg. Jwøk ɑ pɑ nyi thøw pɑ mɑlli yi gen, de ge ɑ́yöd ge mɑll-ɑ gïg-ɑ nyi gwøg yi gen, ge nɑ ji yøw, wɑlɑ̀ winy, wɑlɑ̀ lɑ̈yy, wɑlɑ̀ gïg-ɑ mulli kì piny.