Popular Bible Verses from Ebrei 11

Share

Awanan iko neruk, inyi itahutak jio arai erre hunne eyihi hode. Inyi buo fe italeyehi erre hunno obeŋ onyek igonyu. Omuno nyia Hollum aati eberien te eruk hosi.

Ittallik tulo itamuno Hollum alla abeŋ neruk jihonyi, nyio, lia alla awak 'to ittuna jio Hollum, ijiara luŋa inyi iruk jio owon Hollum hode; buo fe Hollum isiaratta ayiji jio lia, ollo ottifia 'to inyi.

Neruk itamijanak hohoi jio, oyyeuni nyia nafau iko nedou te nekiana Hollum. Emijak buo fe jio, oyyeuni nyia erre hunne igonyu onyek jio hunno obeŋ onyek igonyu.

Te neruk, oniŋio nyia Abramo to ninyia iloŋuniere Hollum inyi ilari jio obo afau ninyia ocorok Hollum jihonyi; ette inyi leten, duadi bu obeŋ inyi omijak alo inyi ajia. Te neruk, amanya nyia inyi olotere jio afau ninyia ocorok Hollum jihonyi. Amanya nyia ihasik musiama, ihuo ninyia tono ba Isako iko Yakobo, hinyia ofuonni buo fe ifuotuni ecorit nyia.

Ta awanan Noa iko neruk, asar nyia Hollum inyi te eram ono erre hunno ofuoi 'to iduoŋ moi. Ania, oniŋiere Noa eram Hollum, ette ihuhumuna atogol ninyia italuahu 'to inyi iko aati hutta haŋ honyi. Tania, oŋotoniere Hollum epali jio atulo 'daŋ ta fau, buo ihan Noa a habisani te neruk ottononyi.

Ittallik nyia Enok iye te eram ono neruk ottononyi; ania, omunori Hollum inyi, ette ikafaru inyi lidou. Obeŋi nyia orumani ahuan honyi nyio iyarai nyia inyi jio Hollum.

Te Neruk, isio nyia Abele ehumi jio Hollum onno oyyu agalik ehumi Kaino. Te eruk Abele, itahutak nyia Hollum amuno honyi Abele te efuotuna honyi esiorita honyi. Aye nyia Abele, ati, harasa neruk honyi ikiana jihohoi.

Te neruk, oremik nyia Abramo isiuna eto, duadi bu imaruak inyi bebe buo fe ŋoruoi honyi Sara aŋot esio. Iyihi nyia inyi jio ihan adi Hollum eram ninyia ocorok inyi.

Itila nyia Abramo imanyari ibore gala ninyia ihuhumu Hollum buo fe oduk, onno owon 'to iko etawoji onno osio 'to 'tulaŋ.

Ninyia labolo Mose, neruk nyia ihan inyi ihari eloŋo waati inyi jio, lonyi ŋarri Faro. Awak nyia inyi idihuna ettigemita arabotie iko aati Hollum, buo obiaŋari irisaniere obo kai amanya ono neyyau. Omijak nyia Mose jio, oyyu luŋa bebe irumaniere ettigemita te eram ono Olonyimoto agalik esamiti Masir 'daŋ; otuhoniere inyi egigilo honyi 'daŋ jio esiorio onno olo inyi ifuotuna moi. Ta awanan Mose iko neruk, inyi ninyia alari inyi addi to Masir, obeŋ ikoddaŋ abaŋ ajore hobu. Ara nyia ihuo elle igonyu Mose Hollum ollo obeŋ 'to oleyo, ania, ette inyi ihara acaharu Masir.

Neruk nyia idehi Abramo isiarak lonyi honyi Isako irari ehumi, to ninyia okemiere Hollum inyi. Isiarak nyia Hollum ecoriti jio Abramo ati, obeŋ nyia inyi iha isiaraniere lonyi honyi olobotie irari ehumi.

Ta awanan ono neruk jio Rahab, nesomo, inyi ninyia obiaŋarik ottohorik inyi iko amiosok Hollum; nyio, ifuotu nyia inyi asiri Israele, onno oyyu.

Neruk ono Israele nyia idehi isi oŋutoroi tottolo afau ninyia owon 'to ihari mile. Buo ninyia akemi aati Masir ihaniere ihuo isi, ette aari ania idiloro isi.

Neruk ono Israele nyia itaritiho eliati ono Yeriko ninyia iluri Israele inyi oŋitek hattarik.

Neruk honyi nyia buo fe ihan inyi iyaŋuno neyom ono Allaŋan jio aati Israele, ette iramana jio ijiara isi iwwasani nooto likatin hasik; ŋadi ajilo olo naye ottu ittohoro oloŋehua hosi.

Ta awanan Yosefu iko neruk, ania, ninyia iliaha inyi naye, ette inyi ikiana jio, iyarai adi addi aati Israele to Masir; ette buo fe iramana aati Israele oŋida iyarai ahoi honyi ikosi.

Ninyia iliaha Yakobo aye, ociehi nyia inyi ahuan litehi, ette imojo. Buo ta awanan honyi iko neruk, ajak nyia inyi lonyirok Yosefu 'daŋ ababo.

Neruk ono Isako nyia ihan inyi isiaraniere ejahiti huno moi jio Yakobo iko Esau.