Popular Bible Verses from ފިލިއްޕީގެ މަސީޙީންނަށް ސިޓީ 3

Share

އަޚުންނާއި އުޚުތުންނޭވެ! އަހަރެންދެކޭ ގޮތުގައި އަހަރެންގެ ލަނޑުދަނޑިއާއި ހަމައަކަށް އަދި ނުދެވެއެވެ. އެހެނަސް އަހަރެން އަބަދުވެސް ކުރާ އެއްކަމެއް ވެއެވެ. އެއީ މާޒީ ހަނދާން ނައްތާލުމަށް ފަހު މުސްތަގުބަލާ ދިމާއަށް ދެމިގަންނަން ކުރިމަތިލުމެވެ. އަހަރެން ދެމިގަންނަން ގަދައަޅާނީ ލަނޑުދަނޑި އާއި ދިމާއަށެވެ. އޭރުން އަލްމަސީޙު އީސާގެފާނު މެދުވެރި ކުރައްވާ މާތްކަލާނގެ ގޮވައިލައްވާ ދާއިމީ ޙަޔާތުގެ އިނާމު ޙާސިލު ކުރުމަށެވެ.

އަހަރެންގެ މަގުސަދަކީ އަލްމަސީޙާ މެދު މިގޮތުން އެނގި ގުޅުމެވެ. އަދި އަލްމަސީޙު އަވަހާރަވެ ވަޑައިގަންނަވާ އަލުން ދިރި ވަޑައިގެންނެވި މަތިވެރި ބާރުފުޅު ތަޖުރިބާ ކުރުމެވެ. އަހަރެން ހިތްއެދެނީ އެކަލޭގެފާނު އުފުއްލެވި ވޭނާއި އަވަހާރަވެ ދިޔަ ފަދައިން އެ ގޮތަށް އަމަލު ކުރުމެވެ. އެއީ އަހަރެން މަރުވުމަށް ފަހު ކޮންމެވެސް ގޮތަކުން ފަހުން ދިރިގެން ސުވަރުގެ ދެވޭނެ ގޮތް ވުމަށްޓަކައެވެ.

އެ ހުރިހާ އެއްޗަކީ ވެސް އަހަރެންގެ މާތްސާހިބާ އީސާ އަލްމަސީޙު ދެނެގަތުމުގައި ވާ މިންނުކުރެވޭ އަގާ އަޅާ ބަލާއިރު އެއްވެސް އަގެއް ނެތް ތަކެއްޗެވެ. އެކަލޭގެފާނަށްޓަކައި އަހަރެން އެ ހުރިހާ ތަކެއްޗެއް ގެއްލުވާލީމެވެ. އެ ހުރިހާ ތަކެއްޗަކީ ކުނިބުނި ކަމަށް ހިމެނީމެވެ. އެއީ އަހަރެން އަލްމަސީޙާއި އެކުގައިވުން ލިބިގަތުމަށެވެ.

އޭރު އެތަކެއްޗަކީ އަހަރެންނަށް މުހިންމު ތަކެތި ކަމުގައި ވިއެވެ. ނަމަވެސް މިއަދު އަލްމަސީޙާއި މެދުގައި ވީ ގުޅުމުން އެތަކެއްޗަކީ ބޭކާރު ތަކެތި ކަމުގައި ދައްކުވައި ދެއްވައިފިއެވެ.