Popular Bible Verses from Romanos 8

Share

Y muspatʌs que myaŋjapya oye mumutiyʌ's iwʌ'sta'mis šunba Dios, pero jujche'ŋ Diojsis wyejyatʌju quipsaŋgospo'ʌyušej ñe'cʌ's.

Te'wʌcotoya wiyuŋšej muspa'ʌs que ja'ndʌ yajʌcʌ'i ni ca'a'ŋis, ni quengu'yis, ni angelejsista'm, ni aŋgui'myajpapʌ's, ni pʌmi'ʌyupʌ's, ni yʌtijta'mbʌ tiyʌ's, ni minbapʌ'smaj, ni cʌsmʌpʌ tiyʌ's, ni cʌ'mʌpʌ tiyʌ's, nijutzpʌ tiyʌ'stʌ ja'n musi yajʌcʌ'u wa'ytyʌ jana sunu Diojsis tʌ Ngomi Cristo Jesuspit.

Te'šejtijque' te' Espiritu'stʌ cotzoŋba porque mochita'mdʌ. Ja'ndʌ mba'te'c jutz oye wa'ytyʌ oto'ŋʌyu Dios. Ñe'cʌte' Espíritu jʌ'yo'c toyapʌjcu'c tzamdʌjcʌ'opya tʌcotoyata'm, jana tza'maŋbʌ tzamdʌjcʌ'oquiupyit.

¿Tiya'ndʌ jeque ndzamba te'šejta'mbʌ tiyʌcʌsi? Juca Dios ijtu tʌji'ŋ ja'ndʌ iwʌ's tʌŋgʌteye.

Te'cotoya jeque, ja'na yajtiyʌ quio'aŋgʌyay te' tumʌtzʌquiajupʌ'sa chocoy Cristo Jesusji'ŋ, te' ja'n chʌcjayapyʌ's yatzipʌ wyi'nis šu'noquiuy sino que te' Espíritu Santo's šu'noquiuy.

Juca ŋgotpatʌ ŋguipsoquiuy tʌ ne' nwi'nis šunbapʌ tiyʌcʌsi maŋbatʌ ŋga'tamu. Pero juca ŋgotpatʌ ŋguipsoquiuy Espiritu's šunbapʌ tiyʌcʌsi maŋbatʌ mba'ttamu quenguy y sʌ'mnaquiuy.

Pero como ijtu iwʌ'stʌ sunba, ñe'cʌpit matzcomʌ'ndambatʌ mumu yʌ'šejta'mbʌ tiyʌ.

Porque nʌctʌ'pya'ʌs que te' toya, te' ŋguendambapʌtʌ yʌy, ja'n tyu'mbajcay te' tzi'muŋgʌji'ŋ te' maŋba quiejupʌ tʌ'ojmo.

¿Tiyʌ'sandʌ yajʌcʌ'pa wa'ytyʌ jana sunu Cristo's? Muspasʌ'ŋ toya's, tuyu'yoquiu'yis, yacsnu'ajcu'yis, yu'is, pama ja'ndya'cu'yis, maya'cu'yis o ca'a'ŋis? Nijutz.

Pero te' Dios, 'yoctu'njapyapʌ's tʌ ndzocoy, myuspa tiyʌ quipspa te' Espíritu Santo's. Myuspa que ñe'cʌ's šunbašej tzamdʌjcʌ'opya masanbʌngotoyata'm.

Te'šej mumu jujche'ŋ ñʌtu'ŋajpapʌ Diojsis 'Yespiritu's, te'ta'mbʌ Diojsiste' 'yuneta'm.

Porque iwʌta'm wijtyajpa te' pecapʌ wyi'nis šunbašej quiojtyajpa quipsoquiuy pecapʌ wyi'nis šunbapʌ tiyʌcʌsi.

Te' jatyo'ya'ŋʌpʌ's ni te' ñe' 'Yune, sino que chi'oquia'u mumu tʌcotoyata'm, ¿ja'nsʌ'ŋdʌ tzi'taŋgue'te ñe'cʌji'ŋ mumutiyʌ? Tzi'wa'ndʌ.

Te' mismopʌ Espiritu's, y tʌ ŋguipsoquiu'yistʌ yajmustamba que Diojsistʌte' 'yuneta'm. Y juca 'yuneta'mdʌ, maŋbatʌ nʌtzʌ'ytyamu mbarte Diojsistʌ maŋba tzi'tamupʌ. Cristoji'ŋdʌ maŋba mbʌjcʌchoŋdamu mbarte. Juca tumʌ'ajcu'yoyjtyʌ toyapʌctamba ñe'cʌji'ŋ, tumʌ'ajcu'yoyjtyʌ maŋba yajmʌja'ŋajtamu ñe'cʌji'ŋ Diojsis.

Te'cotoya juca ŋgotpatʌ ŋguipsoquiuy tʌ ne' nwi'nis šunbapʌ tiyʌcʌsi ŋgui'nispatʌ Dios, porque ja'ndʌ ŋgojamjay Diojsis 'yaŋgui'mguy ni ja'ndʌ musi ŋgojamu.

Mumu Diojsis chʌquiajupʌ tiyʌ's cʌñʌñu'c nʌ jyo'cjojcʌtʌquiaju wa'y quieju myʌja'ŋajcuy Diojsis 'yune'sta'mñe'.

Porque mustambatʌ que mumu Diojsis chʌquiajupʌ tiyʌ tumʌ'ajcu'yoyj jʌyajpa y toyapʌquiajpa hasta yʌtij, jujcha' yomo nʌ 'yuña'upʌ.