Popular Bible Verses from AONEGA HEREVADIA 11

Share

Oiemu moni do oi henia bada noho, vadaeni do oi noho namo. Taunimanima haida do oi durua, vadaeni haida ese oi do idia durua.

Tau ta ese iena moni momo, be harihari gauna bamona ia henia noho, to iena kohu bona moni idia bada lao noho. Ma tau ta ese iena moni ia naria noho, bona ia henia momo lasi, to unai tau be ia ogogami noho.

Hekokoroku taudia ese hemarai idia davaria noho, to manau taudia ese aonega idia davaria noho.

Bema bese ta be mai edia gunalaia tauna lasi neganai, unai bese taudia be do idia moru, to bema sisiba namona taudia be momo neganai, bese taudia edia noho be namo.

Kara maoromaoro ese mauri ia henia noho, bona taunimanima edia laumadia, be mauri dekenai ia veria tauna be mai ena aonega.

Hereva kava, hereva kava noho tauna ese, hunia herevadia ia hedinaraia noho, to oi abidadama henia diba tauna ese, hunia hereva do ia hedinaraia lasi.

Mai ena bogahisihisi tauna ese, sibona ena namo ia havaraia noho, to dagedage tauna ese, ia sibona ia hisihisi henia noho.

Iena moni bona kohu ia abidadama henia tauna, be au raurau masena bamona do ia moru, to kara maoromaoro tauna be do ia tubu, au raurau matamatana bamona.

Dirava ena Kota bada dinana dekenai, oiemu kohu bada ese gau namona ta, oi dekenai do idia henia lasi, to kara maoromaoro ese, mase dekena amo oi ia hamauria diba.

Kara maoromaoro taudia be, edia laloa maoromaoro ese ia hakaudia noho, to kara kerere mai koikoi danu taudia, be sibodia edia laloa gagevagageva ese ia hadikadia ore noho.

Bema hahine ta be mai ena hairaina, to mai ena lalona lasi neganai, ia be golo rini, boroma ena udu baubauna lalonai bamona.

Metau sikele koikoidia idia gaukaralaia noho taudia, be Lohiabada ese ia badu henidia noho, to sikele maoromaorodia dekenai Lohiabada ia moale noho.