Popular Bible Verses from Thupiakkikna 8

Share

Ahi hangin amah in tuni-a mah bangin na pute uh tungah kiciamin a thukhun lenkip-a, na hauh theihna uh hong pia TOPA note Pasian ahilam phawk un.

Amah in note hong niamkhiatin hong gilkialsak a, tua ciangin note gen loh na pate un zong a theih nai loh manna in hong vaka, mite anlum bek tawh nungta loin TOPA kam pana pusuak thu khempeuh tawh a nungta ahilam hong hilh hi.

TOPA note Pasian in ama thupiakte na zui uh hiam, na zui kei uh hiam cih note lungsim hong sittel nop manin, note hong niamkhiat a kum sawmli sung sehnel-gam lampi ah hong bangci makaih ahi hiam, cih phawk gige un.

No le no in, "Ka vangliatna le ka khut thahatna tawh kei ading hauhna hizah hong piangkhia hi," na ci thei ding uh hi.

TOPA note Pasian na mangngilh khak ding uh le tuni-a kong piak ama thupiakte, a thukhamte le a thukipte na zuih loh khak ding uh kidawm un.

Tua ahi ciangin pa in a tapa a sek bangin TOPA note Pasian in note hong sek ahilam na lungsim un thei un.

TOPA note Pasian in gam hoih hong pia ahi manin an ne in na kham uh ciangin amah phat un.

TOPA note Pasian thupiakte zui unla ama lampi tawnin zahtak mahmah un.

Sehnel-gam ah na pate un a theih ngei loh uh na nek dingun manna hong pia-a, a tawpna ah note hoih nadingin hong zia-etin hong niamkhiat hi.

Tua hi kei leh, ne in na kham khit uh ciang, inn hoih lamin na ten khit uh ciang, le na bawng honte uh le na tuuhonte uh khangin tampitak a phak khit ciang, na ngun na khamte uh kibehlapin na neihsa uh a pun ciangin na lungsim uh kiphasakin na salsuahna uh Egypt gam panin note hong paikhiatpih TOPA note Pasian na mangngilh kha ding uh hi.

Ahang in, TOPA note Pasian in gam hoihna mun - luitui le bualtui omna, mualtung le guam sunga ciktui a luanna gam; mangbuh le mangbuh-ham, lenggui, theikung, mang-kawlsing, olive thau le khuaizu omna gam; anlum cilbawl lo-a bangmah kisap lohna gam; suangtumte sik hi-a, mualte panin sumsan na tawhkhiat theih nading uh gam ah note hong puak hi.

Note nungta-in pungin na pate uh tungah kiciamna TOPA in a khapsa gam ah lut a na lak theih nadingun tuni-a kong piak thupiak khempeuh limtakin zui un.

Hih kum sawmli sungin na puansilhte uh patkhia loin na khete uh zong a bawk kei hi.

Amah in, a lauhuai sehnel-gam zaipi kantan in tui om lohna keugaw gam sung gul gupha le mom-ai lakah note hong makaih hi. Amah in a sak suangtumpi panin no adingin tui phulkhiasak hi.