Popular Bible Verses from Romanus 3

Share

Mmanawa madikte wixwiy taraksavyekuye. Wixwiy ka huwit avigkutavrikutnema ku samah Uhokri gikiytani. Heneme kibeyne, ig Uhokri hiyap wixwiy kewa kibeynevwibe giwtrik awaku ku samah Cristo Jesus katiwnihe utaraksanwiy udukwenavrikwiy. Wixwiyme ka katiwnih ariknawnema. He wamnihkawiynen ig amnihpewiy hene.

Ig keh wis kibeyne giwtrik awaku ku samah wis kamaxwa givitit Jesus Cristo. Madikte hiyeg ku pariye kamaxwa givitit Cristo ig Uhokri hiyavgikis igkis kewa kibeynevwibe giwtrik hawata ke Cristobe. Inakni hiyakemniki kawih gidahankis hiyeg ku pariye kane judeyenevwima payeke gikakkis hiyeg judeyenevwi, mmanawa Uhokri hiyavgikis hehpekuye giwtrik.

Ig Uhokri awahkise Cristo Jesus adahan ignewa umahkiswe udukwenavrikwiy giwtrikkis madikte hiyeg. Ku samah ig sukase gimig, nikwe ik adahan ig Uhokri bayahminawiy ariw utaraksanwiy wixwiy ku pariye kamaxwenevwi avitit gimiremni adahan in katiwnih utaraksanwiy. Amun ini nikwe ig Jesus akka ku samah igme Uhokri waditye. Kiyavwiye Uhokri ka hiya igma hiyavwiy ke wotbe wixwiy wadityevwibe henenwatma. Heneme ig ka giyaknisima gikakkis hiyeg minikweknenevwi. Ig ka katiwnisa gitaraksankis gitkis, mmanawa ig wahepne Kiyavwiye Jesus katiwnih gidahankis. Kibeyne, kurime ig Cristo aytwe ekke wotwiy ku samah ig Uhokri igyewa kibeyne hiyeg. Mmanawa ig akka ku samah igme Uhokri waditye ig hawata keh wixwiy humaw kewa wadityevwibe giwtrik, wixwiy ku pariye kamaxwenevwi givitit Jesus.

Mmanawa yuma hiyeg kibeyne giwtrik Uhokri awakuma ku samah ig iha giwn amekene Moís gikumadukan. In amekene Moís gikumadukan in he areketninen ku wixwiy taraksavye. In humaw areketni wot awaku ku samah wis ka keh avigkutavrikma ku samah gimawkan.

Henewa in ku samah Uhokri gannasan minikwekne awna. In awna: “Yuma pahavwinema hiyeg kibeyne ay amadga inin. Yuma pahavwinema hiyeg pukuhpene Uhokri gihiyekemni. Yuma pahavwinema mpiksewne aharit gihiyekemni. Madikte hiyeg kuwis tukuhwe giw Uhokri. Igkis madikte kisevyibdi giw. Yuma pahavwinema kehne kabayka. Yumahwatbaki pahavwinema.

Henewatbaki in. Wixwiy hiyakni ku Uhokri hiyavwiy kewa kibeynevwibe giwtrik ka awakuma ukehbetanwiyma ku samah wixwiy ihpene giwn amekene Moís gikumadukan, heneme awaku ku samah wixwiy kamaxwene givitit Kiyavwiye Jesus.

Nukebyi, ig keh madikte. Ig awna avanenekwa ku pariye inyewatnene iwit. Hiyawa madikte hiyeg amadgayavu inin kinis, igme ka kinis. Inakni ku samah Uhokri gannasan kinetihwa gimin Uhokri. In awna: “Kiyavwiye Uhokri, nutaraksan keh nah hiyekep ku pisnewa waditye. Nah hiyekep awaku ku samah nah ka wadit. Inneki keh nah hiyakpi ku pisnewa waditye. Avanenekwa piwn pes waditnenekwa. Ku aysaw hiyeg awna: ‘Awase akak’ ignes tarakse. Pis utipkanek ku pis awna wadit.” Henewatbaki in Uhokri gannasan awna.