Popular Bible Verses from Romans 1

Share

Wesh taapaa nipimaamisiituten miywaachimuwin. Eukw uyuu miywaachimuwiniyuu suuhk yaapachihtaat Chishemanituu chechii ayaayich pimaachihiikusiiwiniyuu misiwe aweyuuh kaa taapwehtamiyich. Niishtam aniyuuh Jewa kaa itiskaanesiyich chii waawiihtamuwaakanuyuu chek aniyuu ekaa Jewa kaa itiskaanesiyich kaa waawiihtamuwaakanuyich.

Ekut kaye miywaachimuwinihch wehchi chischeyihtamihiikuyihkw taanite wehchi kuiskunaakuhaat Chishemanituu aweyuuh wiya ishi e ihtaat. E taapweyimaat awen Jesus ekut mikw wehchi kuiskunaakuhaakanuut Chishemanituuh ishi e ihtaayich. Taapwehtamuwiniyuu pimaachihiikuu awen, kaye eukw uyuu che chiiwehtahiikut. Mwehch e itashtech masinahiikanihch, An kaa kuiskunaakusit taapwehtamuwinihch uhchi eukuu che pimaatisiit.

Aat ekaa muhch chii waapamaakanuut Chishemanituu, misiwe taan kaa ishihtaat uyuu aschiiyuu ekut chechii uhchi piyekasch nisituunamuwaatwaau awenichii ukaachiche suuhkaatisiiwiniyuu kaye ekut chechii uhchi chischeyimaatwaau taapwe e Chishemanituwiyich. Namui maak katachii iteu awen ekaa chischeyihtahk e ihtaayich Chishemanituu.

Wesh maau kaa ishinaakuhch. Chii chischeyihtamuch taapwe e ihtaayich Chishemanituu, mikw namui uhchi wii chisteyimeuch taan chipaa ishi chisteyimeuch kaye namui uhchi wii nanaaskumeuch. Uyuu e ihtitwaau namui papaaspine uhchi iteyihtaakuniyuu taan kaa iteyihtahkwaau e iteyihtaakusiyich Chishemanituuh ekw maak namui mitun kuiskw uhchi ishi kanawaapahtamuch chekwaayuu.

Kweschinamuweuch aniyuu taapwewiniyuu Chishemanituuh kaa pachishtinamiyich chechii chischeyihtaakunuyich. Miiskuch maak nanatayuwiniyuu chii taapwehtamuch. Ishpish wii aniyuuh aweyuuh misiwe chekwaayuu kaa ushihtaayich chechii nuuchiishtuwaatwaau, aniyuuh chekwaayuuh kaa ushihtaayich eukunh aniyuuh newachiishtahkwaau. Chishemanituu maak eukw taapwe tiyepicheyihtaakusit kaachiche chechii maamihchimaakanuut. Amen.

Wesh ekw e nuukuhtaat Chishemanituu kihchikiishikuhch uhchi taan e ishpish mista chishuwaahiikut misiwe aweyuuh aniyuu uhchi e machaatisiyich kaye aniyuu ekaa mitun aapateyimikut. Wesh aniyuu e machaatisiitwaau awenichii nakaahamuch etituu chechii chischeyihtaakunuyich taapwewiniyuu.

Uyuu maak e ihtitwaau awenichii, ekaa wii chisteyimaatwaau kaye ekaa wii nanaaskumaatwaau Chishemanituu ekw anite kaa ishi pachishteyimikutwaau uwiinishuu machi nituweyihtamuwiniwaahch ishi. Waawaach iskweuch chii kweschipayihtaaweuch taan aniyuuh Chishemanituuh kaa itashtaayich e miyunaakuniyich che ishi chischeyimituyich naapeuh kaye iskweuh anite wiichihtuwinihch. Ekun kaa ihtitwaau kaye naapeuch. Chii nakatamuch taan aniyuuh Chishemanituu kaa ishi miikutwaau chechii ishi chischeyimaatwaau iskweuh. Ekw maak naashch e suuhchipayiniyich wiyawaau e machi nituweyimitutwaau. Aniyuu maak e ihtuutaatutwaau naapeuch ekaa mitun pimaamishiitwaau waweshihaakanuuch taan aniyuuh muyaam e ishinaakuniyich chechii ishi waweshihaakanuutwaau. Ekaa aapateyihtahkwaau awenichii taan aniyuuh kuiskw chipaa ishi chischeyimeuch Chishemanituuh kaye ekaa wii piskaataatwaau upimaatisiiwiniwaahch ekw kaa ihtuutaakutwaau naashch ekaa chechii kuiskunaakuniyich taan e iteyihtahkwaau chechii ihtitwaau. Ekw maak e ihtuutahkwaau aniyuuh chekwaayuu ekaa chipaa uhchi ihtuutamuch.

Muyaam naashch e kachehtaaweyihtahkwaau chii iteyihtaakuhiisuuch mikw maak tekash chiishkwehkaanihch iteyihtaakusuuch. Ishpish wii chechii nuuchiishtuwaatwaau kaa chisteyihtaakusiyich Chishemanituu aniyuu kaachiche che ihtaayich, teyakuch aniyuuh manituuhkaanh che nishuunaatisiyich nuuchiishtuweuch, aniyuuh wiyawaau tipiiwe e chii ushihaatwaau mistikuhch ekw maak asiniihch uhchi. Aniyuuh maak manituuhkaanh kaa ushihaatwaau muyaam naapeu maak piyeshiisha maak awesiisa maak nanaahkuu e ishinaakusiyich manichuusha ekun kaa ishinaakuhaatwaau.