Popular Bible Verses from པེ་ཏྲོ་དང་པོ། 1

བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་བསྔགས་བརྗོད་པར༌བྱའོ།། ཁོང་གིས་རང་ཉིད་ཀྱི་ཐུགས་རྗེ་ཆེན་པོ་བཞིན། ཡེ་ཤུ་མཱ་ཤི་ཀ་སྐུ་གྲོངས་པ་ནས་སླར་གསོན་པར་མཛད་པ་བརྒྱུད་ནས། བདག་ཅག་ལ་རེ་བ་གསོན་པོ་ལྡན་པའི་ཆེད་དུ། བདག་ཅག་ཡང་བསྐྱར་སྐྱེས་པར་མཛད་དེ། བདག་ཅག་ལ་འཇིག་པ་མེད་པ་དང་། ནག་ནོག་གི་དྲི་མས་མ་གོས༌པ། ཉམས་པར་མི་འགྱུར༌བ། ནམ་མཁའི་ཞིང་ཁམས་སུ་ཉར་ཚགས་བྱས་ཡོད་པ་བཅས་ཀྱི་བགོ་སྐལ་འཐོབ་པར་འགྱུར་བའི་ཕྱིར༌རོ།།

དེའི༌ཕྱིར། ཁྱོད་ཅག་ལ་དགའ་སྤྲོ་ཆེན་པོ་ལྡན་ཡང་། ད་ལྟ་དཀའ་སྡུག་སྣ་ཚོགས་ཀྱི་ཁྲོད་དུ་གནས་སྐབས་སུ་ཡིད་གདུང་དགོས་པ་ཡིན། ཁྱོད་རྣམས་ཀྱི་དད་པར་ཚོད་བརྟག་བྱེད་པ་དེ་ནི། མེས་བཙོ་སྦྱང་བྱས་ནའང་འཇིག་པར་འགྱུར་བའི་གསེར་ལས་ཀྱང་རིན་ཆེན་པོར་སྣང༌ཞིང༌། ཡེ་ཤུ་མཱ་ཤི་ཀ་མངོན་སུམ་དུ་ཕེབས་པའི་དུས་སུ། དད་པ་དེ་ལ་བསྔགས་བརྗོད་དང་། གཟི༌བརྗིད། བརྩི་མཐོང་བཅས་འཐོབ་པར་འགྱུར་བའི་ཕྱིར༌རོ།།

དེ་ལས་ལྡོག་སྟེ་ཁྱོད་ཅག་ལ་ཞལ་འབོད་གནང་མཁན་ནི་དམ་པ་ཡིན་པ་བཞིན། ཁྱོད་རྣམས་ཀྱང་སྤྱོད་ལམ་ཀུན་ནས་དམ་པ་ཡིན་དགོས༌ཏེ། གསུང་རབ་ཀྱི་མདོ་ལས་ཇི་སྐད༌དུ། བདག་ནི་དམ་པ་ཡིན་པའི༌ཕྱིར་ཁྱོད་རྣམས་ཀྱང་དམ་པ་ཡིན་དགོས༌སོ། །ཞེས་བཀོད་པའི་ཕྱིར༌རོ།།

ཁྱོད་རྣམས་ནི་བཀའ་བརྩི་བའི་བུ་ཕྲུག་ཡིན་པ་བཞིན། སྔོན་ཆད་རྨོངས་པའི་དུས་ཀྱི་འདོད་ཆགས་བཞིན་དུ་མ་བྱེད༌ཅིག

དེའི༌ཕྱིར། ཁྱོད་ཅག་གིས་རང་གི་སེམས་གཅུན་ཞིང་རང་ཚོད་ཟིན་དགོས་པ༌དང༌། ཡེ་ཤུ་མཱ་ཤི་ཀ་མངོན་སུམ་དུ་ཕེབས་པའི་དུས༌སུ། ཁྱོད་རྣམས་ལ་གནང་ངེས་པའི་ཐུགས་རྗེ་ལ་བློ་སེམས་རྩེ་གཅིག་གིས་རེ་བ་གཟུང་དགོས་སོ།།

ཅིའི་ཕྱིར་ཞེ་ན། ལུས་ཅན་ཐམས་ཅད་རྩྭ་དང༌འདྲ།། གཟི་བརྗིད་རྩྭ་ཡི་མེ་ཏོག༌འདྲ།། རྩྭ་ནི་བསྐམས་ནས་མེ་ཏོག༌ཡལ།། གཙོ་བོའི་བཀའ་ནི་རྟག་ཏུ་གནས།། ཞེས་གསུངས་པའི་ཕྱིར༌ཡིན་ཞིང་། ཁྱོད་རྣམས་ལ་བསྒྲགས་པའི་འཕྲིན་བཟང་ཡང་བཀའ་འདི་ཡིན༌ནོ།།