Popular Bible Verses from A̱romawa 3

Share

Mat konyan nyia̱ a̱ka̱tuk nyia̱. A̱mgba̱m zi̱t, zi̱ si̱ lat zi̱ ntat gak a̱kyenkyai shi A̱gwaza hu. A̱mgba̱m ma̱ng a̱nia, A̱gwaza a̱ fwuong shok konyan a̱ni, a̱ tak kpa̱sai nang gu nkyiak zi̱t zi̱ yet á̱tsotswat á̱niet ba̱ sang a̱bun a̱zaghyi nggu a̱ni. A̱gwaza nyia̱ si̱ huni di̱n vak Kristi Yesu, di̱n jen nang gu nsan nzi̱t zi̱ yet á̱sa̱t á̱niet da̱ a̱vwuo nggu a̱ni.

A̱gwaza na tak kpa̱sai nang gu nkyiak zi̱t zi̱ yet á̱tsotswat á̱niet ba̱ sang a̱bun a̱zaghyi nggu, di̱n vak nwuak fwuo di̱ Yesu Kristi hwa. A̱wot vak huni hwa yet a̱tsatsak wu nang konyan na nnwuak fwuo da̱ nggu a̱ni; ku a yet a̱tyu A̱yahudawa wa, ku a̱tyu Nwap a̱ nwai yet A̱yahudawa a̱ni.

A̱gwaza ku neap Yesu kpa̱sai a̱ yet za̱nang a̱ ka chi a̱ka̱tuk nyia̱ nzi̱t wu. A̱gwaza na tak kpa̱sai nang gu nkyiak á̱niet ba ba̱ yet á̱tsotswat ba̱ sang a̱bun a̱zaghyi nggu di̱n vak nwuak a̱chuchuk mba hu nang Yesu Kristi neap swuan nggu ji, ji̱ yet za̱nang da̱nian nzi̱t a̱ni; ma̱ng si̱sak nang gu nnwuak a̱sok nggu na, a̱ si̱ khwu da̱ a̱team a̱khwu wu a̱ni. Za̱nang jini tak nang A̱gwaza nfaat shi̱ri̱ya nggu ji tsotswat, nang gu mbwuok lilyim a̱ si̱ tyia̱ á̱niet ba, ba̱ nyia̱ a̱ka̱tuk nyia̱ gbangbang a̱ni, si̱ swuo a̱bung bah. Nang A̱gwaza nnyap fwuo nggu hu a̱ni, a̱ nwuan á̱zanson, a̱ si̱ mun a̱ ntyia̱ á̱niet gbangbang a̱bya di̱ kyang nang gu na nyia̱ di̱ yong huni a̱ni, a̱ ka tak nang nggu ma̱ a̱pyia̱ nggu ngyet a̱tsotswat wa. A̱wot a̱ bu chat a̱ tak kpa̱sai nang gu nkyiak konyan a̱ yet a̱tsotswat ma̱ng sang a̱bun a̱zaghyi nggu di̱n vak nwuak fwuo di̱ Yesu.

Mat á̱ mbyia̱ a̱tyu nang A̱gwaza na tak kpa̱sai a̱ kyiak gu nang a̱tsotswat a̱yin a̱ sang a̱bun a̱zaghyi nggu, di̱n vak khwi doka hu a̱ni bah. A̱wot ta̱m hu nang doka ji nyia̱ a̱ni, huhwa yet; ku tak a̱tyubishyi nang gu ngyet a̱tyu a̱ka̱tuk nyia̱ wa.

Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Á̱ mbyia̱ a̱tyu a̱ yet a̱tsotswat a̱ni bah, ku a̱tyo a̱nyiung. Á̱ mbyia̱ a̱tyu a̱ byia̱ a̱tsatsak mumwang a̱ni bah. Da̱ mba, á̱ mbyia̱ a̱tyu a̱ chat a̱ shya̱ A̱gwaza a̱ni bah. A̱mgba̱m á̱niet ba ba̱ ni̱ bwuak ba̱ tyia̱ zat. Ba̱ si̱ yet á̱niet sang tswá bya. Á̱ mbyia̱ a̱tyu a̱ nyia̱ a̱tan kyang a̱ni bah, ku a̱tyo a̱nyiung.”

Mat a̱nia, A̱gwaza tak kpa̱sai nang gu nkyiak zi̱t zi̱ yet á̱tsotswat á̱niet ma̱ng sang a̱bun a̱zaghyi nggu, mat nang zi̱ nnwuak fwuo di̱ Yesu Kristi wa a̱ni, a̱wot kang ma̱ng khwi doka ja.

Kaai, ku ma̱ chunchwiit! Ku nang konyan ngyet a̱tyu a̱ka̱laa wa a̱ni, A̱gwaza yet a̱tyu a̱tsatsak a̱lyiat wa. Ma̱nang á̱ ndyuut tazwa A̱gwaza ma̱ A̱lyiat nggu na a̱ni, nyia̱, “Kuzang jen nang a ndyiat, konyan na fa̱k nang a ndyiat a̱tsatsak a̱lyiat wa za̱m. A̱wot a na swuo chet a̱tyu lak li ang wu mi̱ tutu shi̱ri̱ya.”