Popular Bible Verses from Aisea 61

Share

Sa nabulu te Zihova si zama, “Sa Maqomaqona e Zihova sa Baṉara si koa koa Rau, sina e Zihova ele vizata Au si Arau pude tarae nia sa Inavoso Leana koa rini pu habahuala. Asa garunu Au pude va manoti saripu kuliusu, pude tozi vura nia sa tinarupaha koa rini pu ta raovo, meke pude rupahi pa hinuporo sarini pu ta pusi. Pude tozi vura nia sa vuaheni tanisa tataru na minana te Tamasa, meke sa rane tinubehe tanisa nada Tamasa, pude va manoti sarini pu kuliusu, meke variponi la koa rini pu kuliusu pa Zaione, pude va hakeni koa rini sa toropae doṉo lea meke lopu na eba, na oela qinetuqetu lopu na kinuliusu, meke na poko vinahesi lopu na tinalotaṉa. Kote ta pozae na hudahuda oaku tana tinoṉoto si arini, sapu e Zihova na letei pude va dogoro vura nia sa tinolava te Zihova.

Lopu kote kurekure sari Qua tinoni ba kote vagia tu rini koa Rau sa hinia tanisa koburu kenuna, meke lopu kote talotaṉa si arini ba kote qetuqetu nia rini sa dia tinago; ke kote tagoi rini si karua dia hinia koasa pepeso, meke na qinetuqetu sapu loke vina betona si kote koa koa rini.”

Qetu hola si rau koe Zihova; sa maqomaqoqu si qetuqetu koasa qua Tamasa. Ura na poko nau Sa sa poko hinarupu meke va hake nau Sa sa poko doduru sapu sa tinoṉoto, gua sa koreo sapu va nama varihaba si va saria sa batuna guana hiama, meke sa vineki va nama varihaba sapu va sari pule nia koari na patu ṉedala.

Kote kuri pule i rini sari na vasina ta huara pukerane meke tavete pule i sari vasidi sapu seunae ta huara; kote va vaqura pule i rini sari vasileana lavata sapu ta huaradi, sapu pa soku sinage si koa ivulu eko mo.

Ura gua sapu sa pepeso sapu va liho sage linetelete meke sa inuma sapu va toqoli sari na kiko, si e Zihova sa Baṉara si kote tavete guni ni Sa sari na tinoṉoto meke na vinahesi pude vura sage meke ta dogoro koari doduru butubutu.

Meke gamu si kote ta pozae na hiama te Zihova, kote ta pozae na nabulu tanisa nada Tamasa. Kote vagi si gamu pa tinagotago tadi na butubutu, meke pa dia tinagotago si kote vahesi puleni gamu.

Zama se Zihova, “Ura Arau, Zihova si tataru nia sa ṉinoṉo; kana ia Rau sa hinikohiko meke sa kinaleana. Pa Qua ṉinoṉo si kote pia i Arau si arini meke kote tavetia Rau koa rini si keke vinariva egoi sapu kaqu koa hola ninae rane.