Popular Bible Verses from Aisea 60

Share

Gasa turu Zerusalema, mamu ṉedala vura, ura sa mua kalalasa si ele kamo, ke ṉedala vura se Zihova koa goi.

Sari butubutu si kote mae koasa mua kalalasa, meke sari baṉara si kote mae koasa maraqatana sa mua rane vaqura.

Doṉo la, sa hinuporo si nobia sa popoa pepeso meke moatana sa huporo sapu opo la koari na tie, ba sa kalalasa te Zihova si kamo atu koa goi meke sa Nana ṉinedala si vura koa goi.

Sa tatamana sapu visavisa hola si kote ta evaṉae na tina tie, sa puku tatamana si kote na butubutu ṉiṉirana. Arau se Zihova; pa nana totoso kote tuturei taveti Arau si gua arini.”

Sa rimata si lopu kote na mua kalalasa pana rane, babe sa sidara si pude ṉedala atu pana boṉi, ura e Zihova sa mua kalalasa ninae rane ka rane, meke sa mua Tamasa asa sa mua tinolava agoi.

Sa mua rimata si lopu kote lodu pule, meke sa mua sidara si lopu kote nae tada pule; ura e Zihova sa mua kalalasa ninae rane ka rane meke sari mua rane talotaṉa si kote beto mo.

Meke kote doṉo la si agoi meke kote bakala sa mua qinetuqetu, kote magasa sa bulomu meke siṉi ia na qinetuqetu; sari tinagotago sapu karovo kolo lamana si kote ta paleke atu koa goi, koa goi kote atu sari tinagotago tadi na butubutu.

Va eṉa sagei sari matamu, mamu doṉo varikali: Doduru si varigara meke atu koa goi; sari tumu koreo si mae pa seu, meke sari tumu vineki si paleki rini guana koburu hitekedi.

Gua meke kote koa toṉoto sari mua tinoni meke tagoa rini sa pepeso ninae rane ka rane. Arini sari na linetelete sapu letei Rau, na tinavete pa Limaqu soti pude na vinahesiqu Rau.

Lopu kote ta avoso pule sa vinaripera pa mua pepeso, babe na kinolura babe tinahuara pa korapana sa mua voloso, ba sa hinarupu te Zihova si gua rina mua goba, meke sa vinahesina Sa si koa koa rini pu nuquru koari mua sasada.

Sari sasada tamugoi si kote koa tukele eko lamo, lopu kaqu tava tuku si arini, boṉi na rane, pude sari tie si kote boka paleke mae ni koa goi sari tinagotago tadi na butubutu, sari dia baṉara si kote ta turaṉa guana tie ta raovodi.

Rovana kameli si kote siṉi pa mua popoa sari kameli vaquradi pa Midiani meke pa Epaha. Meke doduru pa Siba si kote mae, paleke qolo meke oto huda humaṉa lea meke kote zama nia rini sa vinahesina e Zihova.

“Sari tie karovodi kote kuri pule i sari mua goba, meke sari dia baṉara si kote nabulu nigo. Pa Qua binugoro si seke igo tugo Rau si agoi, ba kamahire kote va dogoro nigo Rau sa Qua tataru.

Luara panigo Rau meke bugoro nigo, meke ta huara meke ivulu si goi, ba kamahire si kote tavete igo Arau pude na vina lavata loke vina betona si agoi, meke na qinetuqetu koari doduru sinage na sage.

Kote napoi goi sari na meleke tadi na butubutu meke ari kalaho kote kopu nigo. Gua meke kote gilania goi sapu Arau, se Zihova, Arau sa mua Hinarupu, pu vata rupaha igo, na Tamasa Ṉiṉirana te Zekopi si Arau.