Popular Bible Verses from IBRINYU 11

Share

Ketenyen le sidyü hyu kemvu dan hyulo titse sha tsentsü kela nme. Kechamvule tsügenyu nbon nyu ju ai Sunggigü no anyugun le gwa letse kelo gwünzin.

Lo ketenyen sen mvutse Sunggigü kenyü thyülo nrün ndi. Kechamvule temi lihigüe Sunggigü ki keryü nyu le a-le bin tsekethyü lo a-fü kehü nyu chün thyü pe tsü hü tsekethyü tenyen mvulo shvu.

Ketenyen nyu kazü gü hile Sunggigü jo nyu nyhunlo, tson-o nle hyulo kegwa dan hile hyulo nrün kendi nyu chwiryü tse kethyü nle shalo.

Ketenyen genyu Abraham ko Sunggigü le a-ko keshü ka a-jo zen-o a-no gwenlo nrün nme hyulo titse keshü nyu gunlo; lo a-le dikipon gun tiyo shamvu tse güla. Ketenyen genyu a-le tesin ki kehü hontse zope a-tsü kenjü kazü gü nyu tesin thyüo a-zen-o tha zope anyugun ketsü kerhün kethyü Isak lo Jakob au ai zen-o phika nyu yhun.

Ketenyen genyu Noah ko hyumvue petsülo mvulo keshvu le ryü kezhü Sunggigü kanyu jo shalo-o a-nyun nkhi ketsin thyüo a-kaminyu kenilo nrün genyu zürun nme chalo, lo hige a-le kazü gü nmula, lo tson-o ketenyen genyu a-le ketsen gwen kelo gü thyülo la.

Ketenyen genyu Inok-e kesi hyu loho letseo a-zen küla, lo tson-o a-hyumvu la, kechamvule Sunggigü le a-zenlo kela genyu; a-zen kü kela mhundyü a-le Sunggigü kenyü thyülo letse a-jün zo ryü la.

Ketenyen genyu Abel le Kain nyeki a-kershvu gwakvu kethyü nme thyü pe Sunggigü rüshvulo; ketenyen genyu Sunggigü le a-le tha sen ryüo rüshvu keshü khilo-o a-le kentsen nyu letse kolo; lo a-le sila-e a-ketenyen le jozo bin nyo.

Ketenyen genyu Sara le then kela siki-e kekvu hyulo-o nyuphou pvülo a-le tha zope kenjü gü jo le ketsin letse tenyen kelo genyu.

Kechamvule a-le rünyi nyida a-bin kekhwen le binzin kehü gü nri bin, tsügü thyü keshü lo zü keshü gü le Sunggigü.

Ketenyen genyu Mosa le peshü soryülo ntsin a-le Pharo nyugi nyu letse ko mvula. A-le gwüngwa me ka kemu nyu a-kenyü yhüdyü thyü kebin nyeki Sunggigü temi ju zen-o meno a-nshwen nyhün kethyü le a-kenyü kvula. A-le Ijipt nyu kenya aphu nyeki Khrista genyu tetsin kepfü we a-kenya le gon kvu letse rüchünla, kechamvule a-le siki a-chün gü fü hü kela genyu. Ketenyen genyu a-le raja gü nyunkenta-e nshvu mvuo Ijipt khelao tinla. Kechamvule a-le a-yhütyü lope hyulo keho gü hyu kebin hontse nyhenhi bin kela genyu.

Abraham le Sunggigü le a-kegwa keshvu sha titse kesoka ketenyen genyu Isak khipe rüshvula, lo zope tsü kenjü hyu kelogü le a-nyuche gü khipe rüshvula titse so.

Ketenyen genyu tenunyu serikemvu gi Rahab le jozen kemvu ju zen-o nkela mvulo, kechamvule a-le a-kenyüo rünyi rüzü keryü nyu nsin kelo genyu.

Ketenyen genyu temi ju le Zükenhon züda-e no kazü kesin hontseo pvüthü chwila Ijipt nyu dan we anyugun hontse ryü kethyü ka zü no anyugun nrhüshvu la.

Ketenyen genyu anyugun le jon tsenyü Jeroki chwida hun shü ntsin chwida le ntsela.

Ketenyen genyu nyuri gü nke gunkeryü gü no anyugun kesü mvulo nrün genyu nkenchwi kelo nga zenlo, lo tezi gü kezün shülo.

Ketenyen genyu Josef le a-kesi kho nni kela siki Israel nyu nyenyu ju le tsonchü chwila nrün rüla zoshü, tson-o a-ru kesun rüla zoshü.

Ketenyen genyu Jakob le sigü kezhü ka jochü pe Josef nyuhvu nme me tse tsüshü, lo a-thün nrhun sen-o Sunggigü rüshvu.

Ketenyen genyu Isak-e siki ryü nrün dan rüla zo-o jochü pe Jakob lo Esau tsüshü.