Popular Bible Verses from Yesaia 61

Share

AWURADE Nyankopɔn honhom wɔ me so, ɛfiri sɛ AWURADE asra me ngo sɛ menka asɛmpa menkyerɛ amanehunufoɔ; wasoma me sɛ memmɛkyekyere wɔn a wɔn akoma abubuo werɛ, mempae ahofadie menkyerɛ nnommum ne nneduadan bue menkyerɛ apokyerɛfoɔ, na mempae AWURADE anisɔ afe ne yɛn Nyankopɔn aweretɔ da no, menkyekyere abooboodifoɔ nyinaa werɛ, menhyehyɛ Sion abooboodifoɔ memma wɔnnɛnso nsi nso mu da ananmu, memma wɔn anika ngo nsi abooboo ananmu, memma wɔn ayeyie ntadeɛ nsi honhom a watɔ bera ananmu, na wɔmfrɛ wɔn tenenee nnua, AWURADE tɛ nnua a ɛhyɛ no animuonyam.

Mo aniwuo no ananmu mobɛnya mmɔho, na ahohora ananmu mobɛdi mo kyɛfa ho ahurisie; ɛno nti mobɛnya mmɔho, mo asase so, daa anigyeɛ bɛyɛ mo dea.

AWURADE mu na me ho sɛpɛ me, na me Nyankopɔn mu na me kra di ahurisie, ɛfiri sɛ ɔde nkwagyeɛ atadeɛ ahyɛ me, ɔde tenenee batakari asi me, sɛ ayeforɔkunu a ɔkeka ne ho bɔ n’abotire, ne ayeforɔ a ɔde ne nnwinneɛ hyehyɛ ne ho.

Na wɔbɛkyekyere tete akurofo ama akanefoɔ amamfo so agyina, na wɔayɛ nkuro agoago ne awoɔ ntoatoasoɔ amamfo no foforɔ.

Na sɛdeɛ asase ma afifideɛ pue na turo ma deɛ wɔadua mu fifire no, saa ara na AWURADE Nyankopɔn bɛma tenenee ne ayeyie afifiri amanaman nyinaa anim.

Na mo deɛ, wɔbɛfrɛ mo AWURADE asɔfoɔ, na wɔase mo sɛ: Yɛn Nyankopɔn asomfo; mobɛdi amanaman ahonyadeɛ, na wɔn adedodoɔ mu na mobɛhoahoa mo ho.

Na me, AWURADE, medɔ atemmuo, mekyiri atirimuɔden ne adwotwa, na mɛtua wɔn ka nokorɛ mu, na me ne wɔn apam daa apam.