Popular Bible Verses from Ukũnukulua 13

Share

Ĩpa paapo makoolĩ masala, unuasio nutĩĩte uulĩngi nwaalie iyalo lya nimu; ingĩ yalo lya kĩuntu. niyalo liakue ingĩ magana mutandatu nĩmakumi mutandatu namutandatu.

Tũlũ naakikyalaa muna nsĩĩ ĩkakumĩtekela, muntu wensi kanga ĩliina liakue ĩsika liandĩkue mukĩtabũ ĩkya upanga kya Muana-nkolo naalĩ muulague pĩna alĩ ikĩĩlĩ kwiĩĩkua umukulĩla wa nsĩĩ.

Ndĩo ĩkutenda tũlũ ensi, aniino nĩakulu, agolĩ nĩatũka, akolelua nĩasese aĩĩkĩlue ugomola mumĩkono yaao nya kĩgoosia kamuĩ muusiu waao, koona tũlũ wensi walekigula kamuĩ kwigulia, isiititũla utĩĩte uugomola, nduo ingĩ ĩliina lya nimu, kamuĩ iyalo lya liina liakue.

Uyo kanga wasole ĩmatepo, ukisholua matepo. Wensi kanga waulage kuyũmba, yumũjĩpĩĩle kwiulagua kuyũmba. Ĩpa papa ugigimĩlia nuusuĩĩli wa eelu.

Namona nimu nĩpũna munanza nĩtĩĩte matũe mupũngatĩ nimpembe kyumi, numumpembe zaakue ngala kyumi, numumatũe maakue miina ma utukĩli.

Nĩpeegua kukĩlaasa nĩeelu, nukukuadula. Nĩpeegua uusũũmi mutũlũ ensi, uluuli, nĩantu, nintambo, nindugu.

Ndĩo yukualĩmĩĩlagiaa naakikyalaa muna nsĩĩ, kuilĩngasĩĩlio yaasio naalĩ mpeegue kukuitenda ntongela ya nimu; nĩkuaĩĩla naakikyalaa muna nsĩĩ kukumĩzĩpĩlia nzegamĩla ĩnimu niasio naalĩtĩĩte uluguma lwiyũmba, ĩpa niĩ mpanga. Nĩpeegua kwiĩĩkĩla umusũũpo munzegamĩla wa nimu, sunga unzegamĩla wa nimu watambule, nukwitenda aasio nasika ĩtekĩĩle unzegamĩla wa nimu aulague.

Nĩnimu naalĩ nĩmĩoonie alĩ yĩmpiani nĩnsuĩ, nĩmĩgulu yaakue alĩ zĩ ya ngaa, numulomo waakue alĩ zĩ wa nsimba. iJoka nalyĩmĩpeela ingũlũ zaakue nityengu liakue lya kĩtemi nuusũũmi wingĩ.

Nĩpeegua mulomo kwitambula makaani namakulu ma utukĩli. Nĩpeegua usũũmi kukĩtuma umulĩmo waakue mieeli makumi manĩĩ nĩbĩlĩ

Lĩmuĩ lya matũe maakue alĩ zĩ yaalaaligue luguma lwa nkia; ĩpa ikyuo liakue lya nkia nalĩkamigua, nĩnsĩĩ yensi nĩkulĩlua kunsooko ya nimu niasio.

Namona nimu nĩnzĩa ninankĩla kwipũna munsĩĩ, ndĩo alĩ ĩtĩĩte mpembe zibĩlĩ mpiani ya muanankolo, nĩtambula zĩ ijoka. Yukutumĩlaa usũũmi tũlũ wa nimu nya muandio ntongela yaakue, nukukumĩtenda ĩnsĩĩ sunga tũlũ naikikyalaa muasio amĩtekele ĩnimu nya muandio, niasio uluguma luakue lwa nkia naalĩ lukamigue.