Popular Bible Verses from Agalatia 5

Share

Ĩpa itĩ ĩnkali ya kĩMuau ntĩyĩ. Uloogua, ulumbi, matiliga, ugigimĩlia untu nauuza, ukende, usuĩĩlua, upolo, kukĩgilia; munkaani nazĩkĩna izi kutilĩ kaUlagĩĩlio.

Mbũgile gua, gendelĩ mwa kĩMuau; yaasio sika mukitimĩĩlia kainiino inshula za kĩmuĩlĩ.

Nakwikyale mwa kĩMuau, nakugendela mwa kĩMuau.

Nĩaasio a kĩKilisito Yesu aukoonontelĩĩle umuĩlĩ mumusalaba palumuĩ nĩmasĩĩgo namabĩĩ ninshula nambĩĩ.

Nuutendi wakĩmuĩlĩ ingĩ kualiĩ, nduo ntuu, ugololia, udobũ, usambo, wĩtekela anzegamĩla, ulaguli, usuukĩlua, uleei, wĩĩlũ, utaki, magũndo, wĩkamatuli, ukomia malindĩ namabĩĩ, kĩaya, uulagi, lugaalo, ulakũ, nĩnamĩngĩ namĩpianile nĩndaaya. Mumpola izi numuĩĩlĩĩle peelu kĩna alĩ numuĩĩlĩĩle ĩmuandio; ĩaasio naakutendaa namĩkĩna maasio sika ikishaala uutemi wa kĩNzua

Kuitĩ iinie anũna aane, alĩ muĩĩtue mutũle akolelua; ĩpa uukolelua waani ulekitũla nsooko ya kutiata kimwĩlĩ, ĩpa mwĩtumĩkĩle niinie kuniinie kunzĩla ya uloogua.

Kuitĩ inshula za kĩmuĩlĩ zĩkĩsinkaa nuMuau, nuMuau ukĩsinkaa nĩkĩmuĩlĩ, kuitĩ ĩzaasio zĩkĩsiitĩlagiaa inene, koona mulekitenda zaasio kĩna musiile.

Kuitĩ uUlagĩĩlio tũlũ utimĩĩligue mulukaani lumuĩ, ndulo ntuulu, “Umuloogue umunakaa waako kĩna ĩnkolo yaako.”

Kuleke kĩkeema nakanda, nukukĩgaalĩla nukukĩlũĩla uwĩĩlũ.

Kuukolelua uKilisito nukutenda akolelua; luulo gua, ĩĩmĩkĩ kuukamatĩkũ, muleke kĩtuala kangĩ mũpyĩmpĩ lya usese.