Popular Bible Verses from Isaya 54

Share

To koro onge gir lweny molosi ni mondo ohinyi, ma nohinyi, bende inilo buche duto modonjnie. Mano e pok ma jotich Ruoth Nyasaye yudo. Adier, mano e gueth ma asemiyogi. An Ruoth Nyasaye ema awacho kamano.”

Kata da bed ni gode madongo lal nono, kendo gode matindo gol, to an herana ok nolal nono, bende singruok mar kue mane atimo ok nogol kuomi. An Ruoth Nyasaye ma kechoi ema awacho kamano.

Kik ibed maluor, kata kik chunyi nyosre, nikech ok niyud wich kuot. Ndalo biro chopo ma wiyi nowilie gi wich kuot mane iyudo ka pod itin, kendo ok nichak ipar chandruok mane ineno kane idong’ chi liel

nimar Jachwechni e chwori! Nyinge en Ruoth Nyasaye Manyalo Gik Moko Duto. Adier, Jawarni en Ng’ama Ler mar Israel, ma iluongo ni Nyasach piny ngima.

Med odi, obed maduong’. Adier, yar rageng’ mag hembi malach, bende tud tondene obed maboyo, kendo igur loyene obed motegno

Ruoth Nyasaye ema nopuonj joma geri duto, kendo nyithindi nodhi nyime maber ahinya.

Kane mirima ohinga, ne apandoni wang’a kuom ndalo matin, to koro asekechi gi ng’wono mochwere. An Ruoth Nyasaye ma Jawarni ema awacho kamano.

Chutho, ne ajwang’i kuom kinde manok, to koro abiro dwoki dala gi hera matut.

Gik mosetimore miyo aparo ndalo mag Nowa. Kaka ne akuong’ora e ndalogo ni pi mane oimo piny ok nochak oime kendo, e kaka koro akuong’ora ni mirima ok nochak omaka kodi kendo, bende ok nachak adhawni.

Diriseni to abiro loso gi kite makwar, mi aket kite mang’ang’ni e dhorangeyeni, kendo ager ohingani gi kite ma nengogi tek.