Popular Bible Verses from Ashlish 21

Share

As glennee Jee ersooyl dy chooilley yeïr veih ny sooillyn oc, as cha bee baase ayn maghey shen, chamoo trimshey, ny dobberan, chamoo vees veg y phian arragh: son ta ny reddyn va roïe er n’gholl shaghey.

As dooyrt eshyn va ny hoie er y stoyl‐reeoil, Cur‐my‐ner, ta mee jannoo dy chooilley nhee noa. As dooyrt eh rhym, Scrieu: son ta ny goan shoh firrinagh as shickyr.

As cheayll mee coraa mooar veih niau, gra, Cur‐my‐ner, ta cabbane‐agglish Yee marish deiney, as nee eh cummal mâroo, as bee ad e phobble, as bee Jee eh hene mâroo, as bee eh yn Jee oc.

As dooyrt eh rhym, Te cooilleenit. Mish Alpha as Omega, yn toshiaght as y jerrey: ver‐yms dasyn ta paagh farrane ushtey’n vea nastee.

Yiow eshyn ta geddyn y varriaght, eiraght ayns dy chooilley nhee, as beem’s y Jee echeysyn, as bee eshyn yn mac aym’s.

Agh adsyn ta faitagh, as mee‐chredjuagh, as adsyn ta cur rish obbraghyn dwoaiagh, as dunveryn, as maarderee, as fir‐obbee, as jallooderyn, as dy chooilley vreagerey, yiow nyn gronney ’sy logh ta lossey lesh aile as brimstone: shen y nah vaase.

As honnick mee niau noa as seihll noa: son va’n chied niau as y chied seihll er n’gholl shaghey; as cha row faarkey ayn arragh.

As honnick mish Ean yn ard‐valley casherick, yn Jerusalem noa, cheet neose veih Jee ass niau, soit magh myr ben‐phoosee coamrit son e sheshey.

As cha row yn ard‐valley shoh feme yn ghrian, chamoo yn eayst dy cheau soilshey urree: son hug gloyr Yee soilshey jee, as ta’n Eayn yn soilshey eck. As nee ny ashoonyn jeusyn t’er nyn sauail, gimmeeaght ’sy toilshey eck: as aynjee ta reeaghyn y theihll soiaghey nyn ghloyr as nyn ooashley.