Popular Bible Verses from Ashlish 2

Share

Ny‐yeih ta red ennagh aym dt’oï, er‐yn‐oyr dy vel oo er hreigeil dty chied ghraih.

Cooinee er‐y‐fa shen cre voish t’ou er duittym, as gow arrys, as jean dty chied obbraghyn; er‐nonney higym hood dy tappee, as scugh‐ym dty chainleyr ass e ynnyd, mannagh gow arrys.

Ny gow aggle roish veg jeh ny reddyn shen nee oo surranse: cur‐my‐ner, nee yn drogh‐spyrryd paart eu y hilgey ayns pryssoon, dy vod shiu v’er nyn browal; as bee shiu fo tranlaase jeih laa: bee uss firrinagh gys y vaase, as ver‐yms dhyt attey dy vea.

Eshyn ta cleaysh echey, lhig da clashtyn cre ta’n Spyrryd dy ghra rish ny kialteenyn. Dasyn yiow yn varriaght ver‐ym’s dy ee jeh billey yn vea, ta ayns mean paradise Yee.

Shione dou dty obbraghyn, as dty hooilleil, as dty hurranse, as kys nagh vod oo gymmyrkey lhieusyn ta olk: as t’ou er phrowal adsyn ta gra dy nee ostyllyn ad, agh cha vel ad; as er gheddyn ad magh dy ve nyn mreageryn.

As t’ou er n’ymmyrkey yn errey, as ta ayd meenid, as er graih my ennym t’ou er hooilleil, as cha vel oo er choayl dty chree.

Eshyn ta cleaysh echey, lhig eh clashtyn cre ta’n Spyrryd dy ghra rish ny kialteenyn. Dasyn ta geddyn yn varriaght ver‐yms dy ee jeh’n manna follit, as ver ym da clagh vane, as er y chlagh ennym noa scruit, nagh nione da dooinney erbee, agh eshyn ta dy gheddyn eh.