Popular Bible Verses from 1 Peddyr 2

Share

Agh ta shiuish sheeloghe reiht, saggyrtys reeoil, ashoon casherick, pobble cosnit; dy jinnagh shiu soilshaghey magh yn moylley echeysyn t’er n’eamagh shiu ass y dorraghys gys e hoilshey mirrilagh

Eshyn ren ny peccaghyn ain y ymmyrkey ayns e chorp hene er y villey, dy voddagh shinyn, ta livreit veih peccah, ve bio gys cairys; liorish ny lhottyn echey ta shiuish er nyn lheihys. Son va shiu myr kirree goll er‐shaghryn; agh ta shiu nish er jyndaa reesht gys Bochilley as Aspick nyn anmeenyn.

Ayns traa dy row nagh nee pobble va shiu, agh ta shiu nish pobble Yee: nagh row er gheddyn myghin, agh ta shiu nish er gheddyn myghin.

Myr oikanyn noa‐ruggit yeearree‐jee bainney spyrrydoil y ghoo, dy vod shiu gaase liorish

Chaarjyn ghraihagh, ta mee guee erriu myr joarreeyn as troailtee dy reayll shiu hene veih sayntyn ny foalley, ta caggey noi yn annym; Leeideil nyn mea dy onneragh mastey ny Ashoonee; son wheesh as dy vel ad loayrt noi eu myr drogh‐yantee, dy vod ad liorish ny obbraghyn mie eu ver ad my‐ner, Jee y ghloyraghey ayns laa yn chooilleen.

Ta shiuish myrgeddin myr claghyn bioal, er nyn droggal seose ny hie spyrrydoil, ny haggyrtys casherick dy hebbal seose ourallyn spyrrydoil, booisal gys Jee liorish Yeesey Creest.

Shen‐y‐fa coyrt dy lhiattee dy chooilley ghoanlys, as dy chooilley volteyraght, as foalsaght, as troo, as dy chooilley ghrogh ghlare

Cheet huggeysyn, myr gys clagh bio, mee‐lowit dy jarroo liorish deiney, agh reiht liorish Jee, as deyr

Myr adsyn ta seyr, fegooish jannoo ymmyd jeh’n seyrsnys eu son coodaghey dy olkys; agh myr sharvaantyn Yee.

Son myr shen ta aigney Yee, dy vod shiuish lesh jannoo mie mee‐hushtey deiney ommijagh y chur ny host