Timoteeo, ech vaʼt u yol toq vaqʼ ootzaqi s-eche: Kamaq kuxh kʼaxkʼo laʼ ulbʼel inqʼa niman tetz Jesuus tuulbʼal inqʼa qʼij uvaʼs yeʼnaq opoonoq viyaʼtebʼal inqʼa qʼij, atz uvaʼs yeʼnaq uloq u quBʼaal Jesuus. Tan at xaol uvaʼ aʼ kuxh isaʼ uvaʼ taʼn koq kuxh sijunal laʼ txhej tetz. Atz at xaol tira txeyel tibʼ taanima tuchʼ puaq laʼ ibʼana. Atz at inqʼa aʼ kuxh oksa qʼijil laʼ ibʼan viʼ imol. Atz at inqʼa yeʼxhal kuxh at itxaʼk s-te. Tul at inqʼa laʼ eesan iqʼij imol. Tul at inqʼa yeʼ laʼ motx qeon itxutx ibʼaal. Atz at inqʼa yeʼ laʼ taqʼ taʼntiuxh, kʼuxh laʼ bʼanax bʼaʼnil s-te. Atz at inqʼa bʼanol yeʼbʼaʼn. Atz at inqʼa jitoq laʼ tzaj t-taanima isaʼt titzʼin tatzik. Atz at inqʼa taʼnxh u tetz laʼ toksa. Atz at inqʼa laʼ txhulin yol tiʼ imol. Tul at inqʼa yeʼ laʼ oleʼv vet tiʼ imaqax u tatxhaʼv vitxhiʼoʼl. Tul at inqʼa tij kuxh ikʼuul laʼ ibʼana. Tul at inqʼa tira laʼ txhiʼkʼuulan u bʼaʼnil. Atz at inqʼa laʼ eesan yol tiʼ ikʼaxbʼisal imol. Atz at inqʼa aʼ kuxh laʼ toksa u tetz. Tul at inqʼa mam aqʼo bʼenibʼ s-nim laʼ ibʼana. Atz at inqʼa aʼ kuxh laʼ taqʼ tatxhaʼv inqʼa josqʼilla txhaq kam uvaʼ laʼ chiibʼisan vatz txʼavaʼ, tul jit aʼ quBʼaal Tiuxh laʼ toksa iqʼij. Tan qeolaqxh vet tetz Tiuxh laʼ ilixi, poro tzʼeqol tzij kuxhtuʼ. Tan jitoq laʼ ikuy ibʼant quBʼaal Tiuxh iqʼesalil s-kʼatza. Ayaʼletz inqʼa xaole, inqʼa yeʼ laʼ utxh abʼant eela ayol s-tuchʼ.