Popular Bible Verses from 1 Xhun 5

Share

Echetz tira kʼuqlel qukʼuul, tiʼ uvaʼ nik tabʼi oʼ, tiʼ kam uvaʼ nik qujaq s-te, oq antxh nik qujaq kam uvaʼ nik isaʼ taqʼax s-qe.

Oqetz qootzaqle uvaʼ nik tabʼi oʼ u quBʼaal Tiuxh tiʼ kamxh invaʼq uvaʼ nik qujaq s-te, tul aʼetz laʼ qubʼan veteʼ uvaʼ, eche qat qukʼull vet inqʼa qat qabʼi s-te.

Tul aʼetz nik qootzaqivat uvaʼ at qaanima tiʼ quBʼaal Tiuxh, tiʼ uvaʼ laʼ qunima inqʼa ibʼekʼbʼal. Tul jit tira tzaʼl koqxh inqʼa ibʼekʼbʼal s-qe. Jaʼletz uvaʼ alamal vet kʼatz quBʼaal Tiuxh, tan nik toleʼv tiʼ imaqt tibʼ tiʼ yeʼ ibʼanax inqʼa kantxhaqla txumbʼal uvaʼ nik ibʼanax vatz txʼavaʼ, uvaʼ nik ibʼan inqʼa yeʼ ootzaqin tetz quBʼaal Tiuxh. Tan tiʼ uvaʼ nik qunima inqʼa bʼaʼnla txhaq yol tiʼ Jesuus, tul nik ilotxh oʼ tiʼ qoleʼv tiʼ qumaqt qibʼ tiʼ yeʼ ibʼanax inqʼa kantxhaqla txumbʼal uvaʼ nik ibʼan inqʼa yeʼ ootzaqin tetz quBʼaal Tiuxh.

Echetz jaʼl uvaʼ at vet tatin tuchʼ viKʼaol quBʼaal Tiuxh, atetz vet qʼij isaqe uvaʼ yeʼl iyaʼebʼal imotxebʼal. Pet jaʼl uvaʼ yeʼl tatin tuchʼ viKʼaol quBʼaal Tiuxh, yeʼletz qʼij isaqe uvaʼ yeʼl iyaʼebʼal imotxebʼal.

Qatetz intzʼibʼa bʼen inqʼa yol sete, ex inqʼa nik qeon uvaʼ at tiqleʼm quBʼaal JesuKriisto taʼn quBʼaal Tiuxh. Echetz laʼ etootzaqite uvaʼ at qʼij esaq uvaʼ yeʼl iyaʼebʼal imotxebʼal.

Tan qootzaqle uvaʼ jaʼl u xaol uvaʼ alamal vet kʼatz quBʼaal Tiuxh, jitetz kuxh aʼ u paʼv laʼ ibʼan tele. Tan aʼ vet quBʼaal JesuKriisto, uvaʼ taqʼ tzaan quBʼaal Tiuxh, nik xeen. Echetz yeʼ laʼ toleʼve u bʼanol tetz yeʼbʼaʼn s-tiʼ, aʼe Satanaas.