Popular Bible Verses from 1 Koriintios 5

Share

Pet toq val inuqul sete tiʼ inqʼa yol uvaʼ intzʼibʼa bʼen sete s-paqxi. Aʼ val sete uvaʼ yeʼ laʼ ebʼan eela eyol tuchʼ inqʼa nik tal tibʼ s-niman tetz Jesuus, tul aʼ kuxh nik ibʼan inqʼa yansa ibʼ, atz inqʼa aʼ kuxh jiqʼal nik ibʼaneʼ, atz inqʼa aʼ kuxh bʼitichla tiuxh nik inatxhkʼuula, atz inqʼa, aʼ kuxh txhejsa yol nik ibʼaneʼ, atz inqʼa qʼabʼareel, atz inqʼa elqʼom. Aʼetz inqʼae jitoq vaʼl laʼ txʼaʼonk ex s-tuchʼ.

Pet eesavaq el u vinaq sexoʼl uvaʼe, eche nik teesat el inqʼa tij imam Israeel u aqʼbʼal jaʼ tuul paan tuulaq totzotz tuulbʼal u nimla qʼij Ipal Aanxel, uvaʼs nik itxʼaʼax inqʼa paan uvaʼ yeʼl aqʼbʼal jaʼ tuul atoʼk. Echetz yeʼl paʼve sexoʼl laʼ ibʼana, eche bʼitoʼq u qʼota uvaʼ yeʼl aqʼbʼal jaʼ tuul paan atoʼk s-xoʼl. Tan yeʼl tokebʼal u paʼv sexoʼl laʼ ibʼana. Tan ech s-tiʼile kʼaxbʼisal u quBʼaal JesuKriisto tiʼ qukolox vatz u kʼaxbʼichil t-inqʼa qupaʼv.

Tan bʼane atetz koq vokebʼal tiʼ talax yol te inqʼa xaol, inqʼa jit niman tetz Jesuus, inqʼa yeʼ atoʼk sexoʼl. Pet taʼn atil vokebʼal tiʼ talax yol sete, ex inqʼa niman tetz Jesuus. Tul kʼuxh ex, tan at etokebʼal tiʼ talax yol te inqʼa emol s-niman tetz Jesuus, inqʼa atoʼk sexoʼl. Pet toq til quBʼaal Tiuxh tuchʼ inqʼa xaol, inqʼa jit niman tetz Jesuus. Tan aʼ quBʼaal Tiuxh laʼ aqʼon kuʼ yol tinuqul s-tiʼ. Echetz nik valte sete uvaʼ ech nik tal viyolbʼal quBʼaal Tiuxh uvaʼ tzʼibʼamal ka s-eche: —Eesavaq el u onkonla vinaq sexoʼl, —chiche.