Popular Bible Verses from Loos 12

Share

Tsi xob ua mej lub neej lawvle lub nplajteb nuav tug qauv, tabsis ca Vaajtswv muab mej hloov dlua tshab kws yog hloov mej txuj kev xaav, kuas mej muaj peevxwm paub tau Vaajtswv tug dlejsab has tas dlaabtsi zoo, dlaabtsi hum Nwg sab, hab dlaabtsi yog qhov kws zoo tshaajplawg.

Cov kwvtij, vim Vaajtswv txuj kev taabncuab kws Nwg tau muaj pub rua peb ntau kawg nkaus le, yogle ntawd, kuv txhaj thov kuas mej muab mej lub cev ua ib qhov khoom fij kws cajsa pub rua Vaajtswv, kws yog dlawbhuv, hab hum Vaajtswv sab. Nuav txhajle yog mej txuj kev pehawm Vaajtswv tseeb ntawm saab ntsujplig.

Ca mej txuj kev casab ua rua mej zoosab, ua sabntev thaus mej raug teebmeem, hab thov Vaajtswv txhua lub sijhawm.

Tsi xob ca txuj kev phem kovyeej mej, tabsis mej yuavtsum kovyeej txuj kev phem lug ntawm txuj kev zoo.

Mej ib leeg yuavtsum hlub ib leeg ib yaam le kwvtij nyob rua huv Khetos, hab ib leeg yuavtsum fwm ib leeg.

Kev hlub yuavtsum ncaajnceeg tag-tag. Ntxub qhov phem, tabsis tuav rawv qhov zoo.

Mej yuavtsum ua txhua yaam ntawm mej feem kuas mej nyob tau nrug suavdlawg sishum.

Cov kwvtij, mej tsi xob ua pauj rua luas, tabsis ca qhov ntawd rua Vaajtswv maamle ua, ruaqhov Vaajtswv Txujlug has tas, “Kuv yog tug yuav ua pauj hab Kuv yog tug yuav rautxim, tug Tswv has le ntawd.”

Yuavtsum rausab ntso ua num tsi xob tubnkeeg. Yuavtsum xyivfaab hlo ua Vaajtswv dlejnum.

Vim txuj moovhlub kws Vaajtswv tau muab pub rua kuv, kuv txhaj has rua mej txhua tug has tas: Tsi xob muab mej tugkheej saib luj dlhau qhov kws tsimnyog, tabsis mej yuavtsum luj mej tugkheej kuas zoo, ntsuag mej tugkheej lawvle txuj kev ntseeg kws Vaajtswv tau muab rua mej lawm.

Tsi xob ua phem pauj phem rua ib tug twg, tabsis yuavtsum ua qhov kws suavdlawg pum tas yog qhov zoo xwb.

Mej yuavtsum ua neej humxeeb nrug rua txhua tug. Tsi xob khaavtheeb, tabsis txaussab hlo nrug cov tuabneeg kws tsi tseemceeb koom uake. Tsi xob xaav tas mej yog tuabneeg txawjntse.

Vaajtswv Txujlug has tas, “Yog mej tug yeebncuab tshaib plaab, mej cale muab mov rua nwg noj; yog nwg nqhes dlej, mej cale muab dlej rua nwg haus; yog mej ua le nuav yuav ua rua txuj kev txaajmuag lug kub nwg.”

Mej yuav tau thov Vaajtswv foom koobmoov rua cov tuabneeg kws tsimtxom mej; thov kuas Nwg foom koobmoov zoo rua puab, tsi yog kuas Nwg foom phem rua puab. Thaus muaj tuabneeg zoosab, mej cale nrug puab zoosab; thaus muaj tuabneeg quajntsuag, mej cale nrug puab quajntsuag.

Muab tej kws mej muaj moog paab cov ntseeg kws txomnyem; hab qheb mej lub tsev rua tej qhua kws taug kev tuaj tau su.

Ntawm peb lub cev yeej muaj ntau yaam lug koom uake, hab txhua yaam ntawd nyag ua nyag num. Ib yaam nkaus le ntawd, txawm yog peb muaj coob leej los peb puavleej koom rua ntawm Khetos; taagnrho suavdlawg puavleej koom ua ib lub cev.