Popular Bible Verses from Dawˬmehˬ 5

Share

“Nawˇ yaw muiˬ paˬ-ehˇ ya dehꞈ ya jawˇ daˆ leꞈ-eu gʼaˇ duˬ maˬ ehˇ, ngaˇ nawˬ-ahˇ biꞈ-euˬ miˇ kʼahˬ laꞈ kʼoeˇ nawˇ ziˇ baw ni maˬ ehˇ, nawˬ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ nawˬ-ahˇ dawˬ biꞈ taˬ-euˬ loꞈ-ehˇ, nawˬ-euˬ aˬ da aˬ ma-ahˇ nawˇ yaw zeu ya baw meh.

Naw maꞈ yaw muiˬ paˬ-ehˇ ya dehꞈ dzaˬ-awˇ, naw maꞈ jawˇ leˇ-eu lehˇ gʼeh-eu miˇ kʼahˬ laꞈ kʼoeˇ yaw muiˬ paˬ-ehˇ ya dehꞈ ya jawˇ ni, zahˇ dawˬ kʼoꞈ dawˬ dawˬ tawˆ luꞈ-ahˇ naˇ haˬ geuꞈ-awˬ.

Tahˬ pahˬ aˬ ma mawˇ kawˇ mehˬ shi nawˇ awˆ byaˆ-awˇ uˬ duˬ maˬ ya tahˬ-a. Aˬ jeˬ miˇ neh ehˇ naˇ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ-aˬ, myaˆ naˆ-eu Miˬyehˇ pyeuꞈ-eu ma. Ngaˬ-ahˇ bye-eu tsawˇ haˬ deuˬ-ahˇ ngaˇ kʼehˬ-awˇ, aˬ yawꞈ maꞈ-euˬ zaˬ ziˇ smˬ ziˇ oeˬ ziˇ keuˆ ni ngaˇ kʼehˬ ma. Ehˇ kʼawꞈ, ngaˬ-ahˇ gaˬ-awˇ, ngaˬ-euˬ zahˇ dawˬ kʼoꞈ dawˬ mehˬ nah caw teh-eu tsawˇ haˬ deuˬ-ahˇ, aˬ yawꞈ maꞈ-euˬ zaˬ ziˇ aˇ heˇ aˇ muiˇ ziˇ keuˆ ni, ngaˬ-euˬ gʼoeˇ-eu gaˬ-eu jeˬ ngaˇ bi mawˇ ma.

“Mˬ kʼoeˇ taˆ maˬ ehˇ, miˇ tsaˬ kʼoeˇ taˆ maˬ ehˇ, miˇ tsaˬ dawˬ dah iˇ cuꞈ laꞈ kʼoeˇ maˬ ehˇ, kʼaˇ jawˇ kʼaˇ jaˆ-eu jeˬ-ahˇ duˇ-eu tahˬ pahˬ aˬ ma mawˇ kawˇ nawˇ maˬ ya tehˆ-a.

“Ngaˬ-euˬ mehˬ shi miˬ yehˇ nui gʼaˬ nawˇ maˬ ya bi jawˇ-a.

“Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ myahˇ-ahˇ nawˇ yehˬ bawˬ sehˇ lu-ehˇ maˬ ya kuˇ niˇ gʼa-a. Aˬ jeˬ miˇ neh ehˇ naˇ, nawˬ-euˬ Miˬyehˇ Sahˬpaˬ Miˬyehˇ pyeuꞈ-eu ngaˇ-aˬ, ngaˬ-euˬ tsawˇ myahˇ-ahˇ yehˬ bawˬ sehˇ lu-ehˇ kuˇ niˇ gʼa-eu tsawˇ haˬ-ahˇ kʼehˬ nehˬ kʼaˆ nehˬ ma.

Aˬ yawꞈ maꞈ aˬ myah luꞈ kʼoeˇ loꞈ-ehˇ tehꞈ-ehˇ nui ma taˬ-awˇ, aˬ myah luꞈ ngaˬ-ahˇ taˬ huiˬ taˬ mahˇ-eu laꞈ kʼoeˇ, ngaˬ-euˬ zahˇ dawˬ kʼoꞈ dawˬ deuˬ-ahˇ naˇ haˬ geuꞈ naˇ, aˬ yawꞈ maꞈ hawˇ-eu aˬ yawꞈ maꞈ-euˬ zaˬ deuˬ uˆ deuˬ mˬ maˬ maˬ byaˆ zaˇ ziˇ yaw muiˬ paˬ-ehˇ ya dehꞈ dzaˬ tehꞈ-a.

“Nawˬ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ nawˬ-ahˇ dawˬ biꞈ taˬ-euˬ loꞈ-ehˇ, jawˇ nah ngeh nah-aˬ, muiˬ-eu shawˇ-eu aˇ nah pyeuꞈ-eu nawˇ noeˬ keuˆ-awˇ, ya lah ya daw meh.

“Aˬ cawˬ-euˬ miˬ zaˬ-ahˇ nawˇ mehˇ juiˇ maˬ ya juiˇ-a. Aˬ cawˬ-euˬ nymˇ-ahˇ maˬ ehˇ, miˇ tsaˬ-ahˇ maˬ ehˇ, zaˬ kʼaˆ deuˬ-ahˇ maˬ ehˇ, mawˇ neˇ deuˬ-ahˇ maˬ ehˇ, mahˬ tahˬ laˆ deuˬ-ahˇ maˬ ehˇ, aˬ cawˬ kʼaˇ jaˆ-eu jeˬ-ahˇ maˬ ehˇ, nawˇ mehˇ juiˇ maˬ ya juiˇ-a.’

“Aˬ cawˬ-euˬ miˬ zaˬ yo zaˬ-ahˇ nawˇ maˬ ya bahˬ-a.

“Aˬ cawˬ gʼaˇ duˬ maˬ tsaˬ maˬ dawˇ-eu saˇ kiˇ nawˇ maˬ ya kamˬ-a.

“Aˬ cawˬ-ahˇ nawˇ maˬ ya sehꞈ-a.

“Aˬ cawˬ-euˬ myawˬ nawˇ maˬ ya kʼoeˬ-a.

Naw maꞈ Iˇjiˇtuˆ miˇ kʼahˬ laꞈ kʼoeˇ aˬ cawˬ zaˬ kʼaˆ geuꞈ-awˇ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ gʼaˬ, ngaˬ-euˬ huiˬ-eu baoˬ hawˇ-eu gʼaˬ-ahˇ gʼoe-awˇ, naw maꞈ-ahˇ ka kʼoꞈ le-euˬ gaˇ noeˬ keuˆ-awˬ. Kʼoeˇ miˇ neh, jawˇ nah-ahˇ lah daw-awˬ lehˇ naw maꞈ-ahˇ ngaˇ dawˬ biꞈ-eu ma.

Nawˬ-euˬ gaˇ mˇ-eu gʼaˇ duˬ aˇ yamˬ koꞈ nah jaˆ meh. Ehˇ kʼawꞈ, shiꞈ nah tiˬ nah-aˬ, ngaˬ-ahˇ damˬ nehˬ taˬ-euˬ gʼaˬ naˬ naˬ-eu aˇ nah pyeuꞈ-eu meh. Aˇ nah kʼoeˇ nah laꞈ kʼoeˇ, nawˇ maˬ ehˇ, nawˬ-euˬ zaˬ deuˬ maˬ ehˇ, nawˬ-euˬ zaˬ kʼaˆ deuˬ maˬ ehˇ, nawˬ-euˬ jeˬ zaˬ deuˬ maˬ ehˇ, nawˬ-euˬ miˇ kʼahˬ laꞈ kʼoeˇ jawˇ luꞈ-eu boeˇ miˬ siˬ kʼaˬ deuˬ maˬ ehˇ, tiˬ gʼaˬ-iˬ gaˇ maˬ ya mˇ-a. Nawˇ gʼaˬ naˬ naˬ-eu loꞈ-ehˇ, nawˬ-euˬ zaˬ kʼaˆ deuˬ-ahˇ kʼawꞈ gʼaˬ naˬ ya bi naˬ meh.

“Ngaˇ-aˬ, naw maꞈ aˬ cawˬ zaˬ kʼaˆ ya geuꞈ luꞈ-eu Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ ka kʼoꞈ-euˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.