Popular Bible Verses from Roma 1

Share

Ma vɔk rekyên Yɛgɛt Yat wɛt, yaga retô Dagwi ra sé ra fwom yi na yɛ̄, na a sey nekên kawɛ mwat de a sey tsak o na yɛ̀. A tānga sey nekên BeYuda e ngyen, ko e bama mo nè vemo de ba sé BeYuda wɛt.

Yɛgɛt Yat o ye dura wɛshɛrɛk gwong de Dagwi e tɛ̀sɛ bemat be sè cik e bayis mɛ. Gwong o, yi e susu mo vɔk e yɛnɛ mo, gwa sé ngan: Bemat bē sey tsak o na Dagwi. A sé sede remo de bà jɛk e Bwok-basa Dagwi wɔgɔ, “Mwat de Dagwi a tɛ̀ a sè cik e bayis mɛ, yaga a sey tsak o na yɛ, a rɔda vɔk neken.”

Yimo yi e jeng de Dagwi à yong jey, pyɛ́ de à yong ye dura a wot wɛshɛrɛk yerê mwat de Dagwi a sé, mwa ano de wot a tɔk di ɛ na bayis mot wɛt. Ye dura, reto mɛ ra vɔk yɛnɛ wɛt, ko yɛ a sé Dagwi mwin. Yaga ano, bemat o ba tɔk ra cuna e ra pyɛ cak wɛt.

Mwa ano de yɛn a tɔk Dagwi, ko yɛn a nɔng ɛ nerey sede Dagwi wɛt, yɛn a to feng a yɛ arɔng wɛt. Ko báre mɛn ha tɛ́ ɛ yapyi zɔng, ko neyey mɛn de na tɔk bare pyɛ cak wɛt na tɛ́ ɛn mwangalang.

Yɛn a sege tsak o e ra Dagwi na bɔs. Yɛn a re a pyɛ́ de ba yong fongol, na be to ra a yɛ̄ fwom, ko ba tik nà re a mwat de a yong yɛ̄ fongol. E yɛ̀ de a vey na be somo hɛ gbak-gbak! Ano.

Dagwi a sé dura shom mɛ wɛshɛrɛk yi e lagwi. Shom mɛ mo ye hwo e ra mwa vemo de be kyɛ́ ɛn Dagwi tanga e ra vemo de be ragas neves detidetu. Yi na negwɔn neves mɛn o yɛn e dulus bemat yi e tɔ̂k tsak o.

Yaga pyɛ́ de yɛn a ra mo, Dagwi a tik ɛn e de vɔkɔs cwey pyɛ́ vyes de ya tɛ̀ ɛn na yɛn a ragas pyɛ̂ rekyen. Beha arɔng ba ga vɔ be kyɛ́ ɛn nà dyɛngɛs na beras e gwong de gwa sé tyɛng, ko ba dal na simo be dyɛngɛs na bemɛn. Ano arɔng, beras ba kyɛ́ ɛn nà dyɛngɛs na beha e gwong de gwa sé tyɛng, ko ba vɔk gbɔng cwey dyɛngɛs na bemɛn. Beras ba ragas pyɛ́ de ya sé byɛm-byɛm na bemɛn. Yi ano, ba hwɔtɔ a bato mɛn tabak de ha jam yaga buru mɛn. Sede remo de yɛn a kyɛ́ ɛn nà vɔk tɔ̂k Dagwi e neyey mɛn, ko Dagwi a tik ɛn na yɛn a bare yapyi zɔng, yaga na yɛn a ra pyɛ́ de ya sé naka be ra yɛ̄ wɛt.

Mwa ano de yɛn a tē, yɛn a vɔk netsitsɛng, ko yɛn a tɛ́ ɛn betɔn. Yɛn a kyɛ́ ɛn nà ré a Dagwi de e ku wɛt fongol, ko yɛn a re a cī fongol e negya, yēmo de ba yong sede bemat de be kushu, kɛ sede benon, kɛ ngyāma, kɛ pyɛ̂ gabaga.