Popular Bible Verses from Pilipi 2

Share

Ŋine ŋinŋine mawa-nagu more me ŋine eŋet biŋek-ŋineŋo wayakane misuk desikei. Midakaka! Ŋine ŋinŋine eŋet biŋek maket bira-nagu more kimakop-ŋine eŋane eŋet me masi tanikŋo ŋinane kait masi me tanik eya edom yuwan-ŋune bile so mayakakatne okangei wane desikei. Ŋine ŋinŋine yeye kine kine bonep eyaka misuk warekakei, ŋei kimakop-ŋine natne eŋane yeye kine kine-ene eya weneŋ warekakei, so qesiŋonbi geulukkei.

Ŋine wet dereretŋine wekuka magekei, yemo Kristo Yesuŋo wet dereret mageke, eyaka magekei

Eŋe naso baŋem qeli kotino Kaisale wane kine so tanik manik eya mageke, ŋo eŋe siluŋ gegeine eya mi ma walukke so Kaisale yuwan kayakane mi wetkeke. Eya okani-yakane, turuŋine yemo eŋe eŋine wet bonep-inane eya korop qeliŋka wareke, pakiso eŋe ŋei yauwine yale okangi paki, qelit medep yauwine okange, eŋe ŋei yale okange, so eŋe ŋei kait toqa ma more kepeo wakonge. Eŋe ketkele geki paki, ŋei yauwine yale aŋa tewe tewek wane numa gesoke, Kaisale wane don mogare ari mage eya wane seukke, eŋine seuseuine eyamo kibeŋ qabeŋ kutno qeu seukke.

Onoka wane, Kaisale eŋe naso baŋem ŋinane koto ŋino urata ma okanmaike, ŋine ma ewek-ŋungi, ewekeu paki, aŋaine teweke eŋine simile mogare urata makei wane.

Kine eya wane Kaisaleŋo eŋe ma wiye more zok manerop weti qeliwo bira-kake, paki eŋet kakapa suwaine mange, eyaŋo eŋet natne korop yuwanka-waremaike. Eso eya wane ewine kito more eŋet Yesu orake, yeye kine kine gege enerop korop, qeli kotino aŋelo, so kepe kutno ŋei magu, so ŋei seuseune qei kepe bano gemami, eŋe baŋ korop wawetene qeu paki umi kesikei, so eŋane bango so eŋane deinoka pa wareyake. So eŋe baŋ korop aŋaene suwaineka aŋage raikei, Yesu Kristo eŋe Waom, so eŋe Kaisale Magak ora mawaka more maine eŋet biŋek suwaine manikei.

Ŋine yeye kine kine makei, eyamo bororomgo geu paki, ŋaba qepok so busu don so aŋa soraŋine midaine geu paki makei. Yale okanbi paki, ŋine maine sot midaine so wet qelaŋan gorop; libe qotqole, Kaisale wane ŋerep medep koboboine yale okane more, borikine kepeo so ŋei borikine-enerop eŋane keuwo gekei, so Waom wane don togogole gegeinerop eya magekei paki, ŋine eŋane keueno serekin edo qeliwo lawe qelaŋan-eneŋo motpi qagagae pamaike, yale ŋinane qelaŋanŋo eŋane keueno lawe qelaŋane payake.

Eso, kima maepkopne, na ŋinerop gekole, naso eyao ŋine naso baŋem aŋane teweke gekoi, eya wane rokopka ukude naso iwao na biraŋune ari kiroine gewe, ŋine aŋane teweke gekoi, yale waka gekei, eyaŋo manerop wele okanmaike. Waom eŋe mo ŋibuke, eya wane ŋine takotke more mapi mapit ŋinane wele marat-kakei wane, kaet so zonom ore ore weneŋ urata togoleka mau paki, wele marat-kakei.