Popular Bible Verses from Isaías 41

Share

Te ma vi koyuꞌu ron, chi oo maa rin jin ron, ni ma vi kuita ron, chi maa rin kuu ia Dios ron, te ndataa rin jandakui ron, vi chituu ña rin, te kotnii guaꞌa ña rin jin ndaꞌa kuaꞌa rin, ja kundee kunijaꞌnu rin.

Chi maa rin kuu Jitoꞌo, ia kuu Dios ron, ja tnii guaꞌa rin ndaꞌa kuaꞌa ron, te kachi rin: “Ma vi koyuꞌu ron, chi chindee chituu ña maa rin”.

Te ndiꞌi ñayiu ka kiti ini nuu ron saꞌa rin ja vi ndukanoi, te vi kendoo ndaꞌui. Te ñayiu ka ndakoo siki ron, chi saꞌa rin ja vi masu nagua ka kuu saꞌuin, te vi nai.

Chi ni ndeneꞌe ña rin ndee jaꞌa ñuyiu, te ni ndakana ña rin ndee jika ka, te kachi rin: “Maa ron ka kuu ñayiu ka jinokuechi nuu rin”. Maa rin ni kaji ña, te tu ni skexiko ña rin jin ron.

Te visi na vi ndanduku ron ñayiu ka kaꞌan uꞌu ña jin ron, su ma vi nukuꞌun ron jin. Te ñayiu ka ndakoo siki ron ja ka jaxin tnaꞌa jin ron, tu saꞌun ka nagua vi kokui nani kuinio ja tu ka na in ka oo.

’Ma vi koyuꞌu ron ñayiu Israel ja suni ka kuu ron ñayiu tatatnoꞌo Jacob, ja ka kuu ron na kuinio tindaku kueli, chi chituu ña maa rin, kachi Jitoꞌo, chi skaku niꞌnu ña maa rin ja kuu rin ia ii ñayiu Israel.

Su roon, ñayiu Israel, chi ñayiu ka jinokuechi nuu maa rin ka kuu ron, chi maa rin ni kaji ña, ja suni ka kuu ron ñayiu tatatnoꞌo Jacob, ja ka kuu ron ndikin tata Abraham, tee ni ondeka tnaꞌa guaꞌa jin rin.

Chi saꞌa rin ja junkoo in yute ndee in tinduu teꞌa vi na kana in nuu ndute maꞌñu in chikoꞌi, vi saꞌa rin ja ñuꞌu teꞌa na kokuu nuu junkuꞌun ndute, te ñuꞌu yichi na kokuu nuu kana ndute.

Te ñayiu ka kundaꞌu ja tu nagua ka nevaꞌi, ka ndukui ndute, te tu ka niꞌi, te vi ka yichi yaa yuꞌi jin soko ndute. Su vi kokaꞌin nuu maa rin ja kuu rin Jitoꞌo, te konini rin tnoꞌo ka kaꞌin, chi maa rin kuu ia Dios ñayiu Israel, te ma xndendoo ndaꞌu rin jin.

¿Te na in saꞌa ndiꞌi tniuu yaꞌa? ¿Na in ni ndakana ñayiu ndee jaxtnañuꞌu ja vi kotekui? Maa rin ja kuu rin Jitoꞌo, ja oo rin ndee jaxtnañuꞌu, te suni koo rin jin ñayiu vi koo sandiꞌi ni ka, kuu ia ni saꞌa yaꞌa.

Te nuu ñuꞌu teꞌa, xtee rin tnu itni vi tnu acacia vi tnu arrayan vi tnu olivo, te nuu ñuꞌu yichi xtee rin tnuyuja vi tnuciprés vi tnuboje, nagua ja na vi kuni ndiꞌi ñayiu nuu vi kondiaꞌi, te na vi skuaꞌa guaꞌi, te vi jinkuiꞌnu ini ja maa rin kuu Jitoꞌo, ja saꞌa rin ndiꞌi yaꞌa, maa rin kuu ia Dios ñayiu Israel ja ni jani ini yaꞌa.