Popular Bible Verses from 1 Timautes 1

Share

Ntawm no yog ib lolus tseeb uas tsimnyog sawvdaws txais yuav thiab ntseeg tias: Yexus Khetos los hauv ntiajteb no yog los cawm cov neeg txhaum kom dim. Tagnrho cov neeg ntawd, kuv yog tus uas txhaum loj tshajplaws.

Tiamsis Vajtswv tabncuab kuv heev, Yexus Khetos thiaj qhia tau Nws lub siabntev uas tsis paub kawg rau kuv, tus uas yog neeg txhaum loj tshajplaws no, ua yamntxwv rau cov neeg uas yuav los ntseeg Nws thiab yuav tau txais txojsia ntev dhawv mus ibtxhis ntawm Nws.

Lub ntsiablus uas kuv hais no twb yog kuv xav kom nej muaj txoj kev sibhlub uas yog tawm hauv nej lub siabdawb siabzoo los, tawm hauv txoj kev uas paub ua qhov zoo, thiab tawm hauv txoj kev ntseeg uas tseeb los tiag-tiag.

Thov hwm txog tus uas yog Vajntxwv mus ibtxhis, tus uas tsis txawj tuag thiab peb qhovmuag tsis pom, Nws tibleeg xwb thiaj yog Vajtswv, thov kom Nws tau txais koobmeej thiab tshwjchim mus tag ibtxhiab ibtxhis! Amees.

Kom peb ncontsoov tias tej kevcai tsis yog rhawv los rau cov neeg ncajncees, tiamsis yog rhawv los rau cov neeg uas tsis coj rawsli txojcai thiab tsis mlooglus, rau cov neeg uas tsis hwm Vajtswv thiab cov neeg txhaum, rau cov neeg uas tsis dawbhuv thiab haislus saib tsis taus Vajtswv, rau cov neeg uas tua niam lossis tua txiv, rau cov neeg uas tua neeg, rau cov neeg uas ua kev nkauj kev nraug, rau cov txivneej uas deev txivneej lossis pojniam deev pojniam, rau cov neeg uas nyiag neeg, rau cov neeg uas haislus dag thiab ua timkhawv cuav lossis ua tej yam uas cuamtshuam Vajtswv Txojlus tseeb.