Popular Bible Verses from Iakopo 4

Share

O le mea lea ‘ia ‘outou tu‘uina atu ‘outou lava i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou.

‘Ia ‘outou fa‘alatalata atu i le Atua, ‘ona fa‘alatalata mai lea o ia ‘iā te ‘outou. Tagata agasala e, inā fafano ia o ‘outou lima. ‘Ia fa‘amamā o ‘outou loto ‘outou tagata fa‘alotolotolua.

‘Ia ‘outou fa‘amaulalo i luma o le Ali‘i, ‘ona fa‘aeaina lea o ‘outou e ia.

A o le alofa tunoa na foa‘iina mai e le Atua e sili atu lona malosi. O lea ‘ua fai mai ai le Tusi, “E tete‘e atu le Atua i ē e mitamitavale, ‘ae foa‘iina mai le alofa tunoa i ē e fa‘amaulalo.”

O le mea lea, o lē ‘ua iloa le mea lelei e fai ‘ae lē faia, o le agasala lea ‘iā te ia.

‘Ua ‘outou ōle atu ‘ae tou te le‘i maua, auā ‘ua sesē ‘ona ‘outou ōle atu, ‘ua fa‘apito ‘ona ‘outou ōle atu i mea tou te tu‘inanau i ai.

O ‘outou tagata mulilua e, tou te lē iloa ‘ea o le fefa‘auōa‘i ma le lalolagi o le tete‘e atu lea i le Atua? O lenei, o sē e fia uō i le lalolagi, ‘ua ‘avea o ia ma tagata e tete‘e i le Atua.

‘Ae lē iloa e ‘outou pe se ā le mea e tupu a taeao. Auā se ā ‘ea lo ‘outou ola? O le puao lava ia, e aliali mai i sina taimi itiiti ‘ona mou ‘ese atu lea.