Popular Bible Verses from Romanos 16

Share

Mã haskai hiweawẽ taeshũ nukũ Epa Deusũ nuku unãnuma hiwemamistũ matu merabewaya mã Satanás txitekĩ ha aka hawaira babutã matũ mae anua kaĩkaĩshanikiki. Mã haska waya nukũ Shanẽ Ibu Jesus Cristõ hawẽ pepawẽ hau matu unãnuma hiwemakubainũwẽ.

Ẽ betsabu inũ ẽ puibuũ, haskaibu mã uĩnũbũ ẽ matu yunuaii. Yusĩnã betsabũ habũ matu parãkĩ nũ haska matu yusĩmis betsa wakĩ matu xinã betsamakĩ matu pashkatirubuki. Uĩrakãwẽ. Haska nũ matu yusĩa mã nĩkamis keskamakẽ hatu danãkĩ hatũ yusĩa ana nĩkama ana hatube itxayamakubaĩkãwẽ.

Haska habu parananãkĩ nukũ Shanẽ Ibu dayashunaiburã, hamẽ ikanikiki. Haska habũ xinaĩ besti abukĩ hatũ hãtxa hawẽrua txẽshwẽ besti hatu hãtxa wakĩ yura betsabu Jesus Cristokiri kakape unãhairariama beparamekanikiki. Haskakẽ hatuki kemama jatu dũkekubaĩkãwẽ.

Nukũ Epa Deusũ matu abukĩ hawẽ kakape Jesus Cristokiri datã akĩ ẽ yusĩmis mã ikũwãriaibuwẽ taeshũ Epa Deusũ matu txĩtũmatiruma ha kẽwanãkãwẽ. Mai hirabi damiwariama na haskakiri Deusũ nuku mekei kai bari itxapa hunekĩ tsuabura yaneri unãmama ibiakũkaini natiã ha hãtxa hakiri hatu kenemakĩ shabakabi wama ini haska Deus ikibi initũ yununi txanima natiã yurabu shukua tibibũ nĩkatã tapĩ keyutirubu wani ma nũ unaiĩ, hau Deusũ hãtxa ikũwãkĩ txibãshanũbunã. Deus ha besti unãnepahaira kẽwãkubainãkãwẽ, niti ikamarã, hawẽ bake Jesus Cristowẽ taeshunã. Haskakirã. Hatiski, ẽ hãtxarã. Paulo