Popular Bible Verses from Colossenses 2

Share

Haskakẽ mã ma Jesus Cristo ikũwãkubainaiburã, matũ Shanẽ Ibu Cristo hiweshunirã, haska abuai keska ishũkubaĩkãwẽ. Haska matu yusĩmisbu txibãkĩ bari tibi heneama ana uke merã ikũhairawakubaĩkĩ Cristokiri tapiĩ ewakaĩkĩ matu pepawaikiri Deus kẽwãkubaĩkãwẽ.

Huni betsabũ hatũ yusĩa beya betsawẽ matu unãnepa wapai matu hatu txibãmakatsis ikaibu hatũ yusĩa pe itsa kayatapiamaki. Uĩrakãwẽ, tsuabũra Cristõ yusĩa danãkĩ hakiri xinaĩ hãtxashunabumakirã. Hakia habu ikirã, na mai anushũ yushĩ kuxipabũ yunuai txibãkĩ yusĩa betsã ani hawẽ yusĩnanaĩ kanenibu txibãkĩ matu amakatsis ikubaĩkanikiki, haska habu yusĩnanãkinã.

Hamẽ uatiã matu hiwearã, matũ txakabu mã heneriamawẽ taearã, mã mawa keska hiwenibuki. Hakia natiã tsuabũra Cristo mã ikũwaĩbu dasibi matũ txakabu Cristowẽ matu buashuniwẽ taeshũ Deusũ Cristoki ma matu dasiwatã hawẽ taeshũ hawẽ hiwea kayabi matu inãniki. Haska wakĩ hawẽ yunua inũ hawẽ nema Deusũ nukubukiri mese wanishũ hawẽ nukũ txakabu tibi Deusũ tanakĩ netãkubainishũ hawẽ taeshũ Deusũ nuku kupitirubiakẽ ha binumai Cristo cruzkia nuku mawashũkĩ nukũ txakabu mastakĩ nuku bepu keyushuniki.

Cristorã, Deusuna hasbia nukũ yura keskatã na mai anu uĩti xarai tashnikiraniki. Cristo mã ma haki dasitã ikũwaĩburã, Cristona dasibi mã hayaki, Deusũ hawẽ kuxipa habiasri inãniwẽ taearã. Ha dikabi yushĩ dasibi inũ, nai tsuma pepa inũ, txakabu dasibi inũ, shanẽ ibubu mai anua shanẽ ibuhairakĩ hatu binu keyuaki.

Judeubu hatũ beya tibi hayabuki. Haska inũ, hatũ beya betsa txibãkĩ piti dasibi pitirubumabia piti betsa besti pitirubuki. Haska inũ, hatũ beya betsa txibãkĩ hawẽ nushuti betsa atirububia betsa atirubumaki. Haska inũ, hatũ beya betsa txibaĩ itxatã besi betsa betsapawẽ besimisbuki, ushe benatiã inũ huĩrukũti sábado tibitianã. Haska tibi txibãkĩ amisbunã, hau matukiri haska xinaĩ ha iyamakubainũbũwẽ. Na beya betsa betsapa tibiwẽ hawẽ Cristokiri xinãmati besti ikubainibuki. Hakia Cristo ma hunikẽ ha beya ana kuxipa hayama hamẽki.