Popular Bible Verses from Romans 6

Share

Bikaaz di pie weh sin gi wi dah det, bot di gif weh God deh gi wi dah laif weh gwain laas fareva —ahn ih frii! Dat dah di laif weh wi get wen wi kom fi bii wan wid fi wi Laad Jesus Christ.

So, sin hafy stap ruul uova unu laif, bikaaz unu no deh liv aanda di Laa no muo. Rait now unu deh liv aanda God gries!

Wen dehn baptaiz wi, dah laik wii wehn ded wid Christ ahn dehn ber wi wid im; so dat jos laik how wi Faada wehn yuuz ihn griet powa fi mek Jesus liv agen, siem wie ihn yuuz ihn powa so dat wi kyan liv wan nyuu laif!

Unu no fi yuuz non paat a unuself fi du notn bad. Insida dat, unu fi gi God unuself fi mek him yuuz unu fi du weh rait aal di taim, bikaaz dah him weh don ton unu aredy fahn det tu nyuu laif.

Ahn wi nuo tu seh di laif weh wi yuuztu liv don ded siem laik wen dehn kil Jesus pahn di kraas, so dat di powa a sin weh yuuztu ruul wi laif kuda get distrai. Ahn dat miin wi no hafy stie sliev tu sin no muo.

Iina di siem wie, unu fi luk pahn unuself laik unu don ded tu, wen ih kom tu sin; ahn alaiv, wen ih kom tu weh God kansaan, bikaaz unu dah wan wid Christ Jesus.

So den, weh wi gwain seh? Wii shuda kiip aan deh sin jos fi mek God kyan kiip aan deh gi wi muo ahn muo gries? Nuo sah! Wi no fi go aan iina wi sinful wie no muo! Sin no gat no muo powa fi ruul uova wii —so dah how wi kyan kiip aan deh sin, den?

Ah shuor seh unu nuo seh wen unu put unuself aanda wan maasta laik wan sorvant, unu don ton unuself fi bii ihn sliev fi obie. Iina di siem wie, unu kyan bii wan sliev tu sin, ahn ded; or unu kyan obie God, ahn mek ihn put unu raichos!

So, mek aala wi gi tanks tu God, bikaaz iivn duo unu yuuztu bii sliev tu sin, now unu don set unu haat fi du aala dehn gud tingz weh wehn tiich unu bout God. God don set unu frii fahn di powa a sin, ahn now unu kom fi bii sorvant fi wi God ahn du weh gud iina ihn sait.