Popular Bible Verses from Zaaburi 103

Share

Singiza MUKAMA, iwe magara gangye, Kandi oteebwa ebirungi byona ebi yaakukoreire.

Niwe asaasira eby'okutahikiirira byawe byona, Akakiza endwara zaawe zoona; Akacungura amagara gaawe, ngu garekye kuhwerekyerera, Akakujweka embabazi n'okusaasirwa nk'ekirunga; Akakuhaazya ebirungi, Ngu obutsigazi bwawe bugarukye busya nk'empungu.

Singiza MUKAMA, iwe magara gangye! Na byona ebiri omuriinye bisingize eiziina rye eririkwera!

Nka ishe w'abaana oku asaasira abaana be, Nikwo MUKAMA asaasira abarikumutiina

Nk'oburugwa-izooba oku eri hare n'oburengyerwa-izooba, Nikwo atwaire atyo hare eby'okushiisha byaitu.

MUKAMA n'omunyambabazi, kandi omusaasizi; Tarahika kuguubwa kubi, kureka agira okusaasira kwingi.

Tatugira nk'ebibi byaitu oku biri, N'obu kwakuba okutuzimuurira nk'okutahikiirira kwaitu oku kuri. Ahakuba nk'eiguru oku riri ahaiguru munonga okuruga ahansi, N'embabazi ezi agirira abarikumutiina nikwo ziri nyingi.

MUKAMA akahamya ekitebe kye eky'obukama omu iguru, N'obukama bwe butegyeka byona.