Popular Bible Verses from Leta po Ibrupipol 13

Share

No meke laip blo yupla po mata pole mani. Mata pilgud po wanem yupla i gad nau, bikoz God i bin spik diskain: ‘Ai nogo libe yupla, ane ai nogo tane baik blo mi prom yupla.’

Tingbaut diswan ya. Zizas Kraist i da seim, yestidei, tidei ane poeba.

So yumpla i ken spik gad strong nau: ‘Diswan da AntapGod uda i elpe mi, so ai nomo go prait nau. Nobodi i ken meke eniting gense mi!’

No piged po mata meke gudting po ol nada pipol, ane yupla mas sere samting wanem yupla i gad po dempla uda nogad. I demkain sakripais nau wanem God i wandem ane wanem i mekem glad.

So tru elp blo Zizas, kam yumpla i go meke opring sakripais po God. Ane dat sakripais nau, i dem prea wea i kamaut prom maut blo yumpla wea i gibe ona po neim blo God.

Ebribodi mas prapa rispekt maret. Maretman ane maretoman mas mata stap strong po wananada, no pleiraun. Bikoz ip maretman o maretoman i go pleiraun no kiptru po maret blo dempla, God i go zaze dempla ane panse dempla.

No piged, ip streinza i wande kam po stap lo aus blo yupla, mata singaut dempla bikoz yupla i no sabe ip dempla i einzel o no. Bikoz i bin apen po sam dem pipol de pas, ol i bin demkain. Dempla i bin singaut streinza po kam insaid lo aus blo dempla, bat dempla no bin sabe demwan i bin einzel.

Ai prea solong da God blo pis, i go gibe yupla ebridem gudting yupla i go nidem, solong yupla i ken meke demting wanem em i wandem. God i da wan uda i bin meke da BosLod Zizas kambaik laipgen prom ded. Zizas, em i da BosLod blo yumpla uda i da prapa bigbos blo dem sip. God i bin mekem kamlaipgen bikoz prom blad blo em wen em i bin ded, ane dat blad blo em i bin meke niu strong griment midel wea God ane ol pipol blo em. Dis strong griment i go mata go poeba i kan pinis. Ane dat paua, da truglori blo God i go mata stap lo Zizas Kraist poeba ane eba. Amen.