Popular Bible Verses from Sua Tutŋana 13

Share

Tomtom ta so igabgaaba wal ŋgarŋan, nako iwe tomtom ŋgarŋana. Mi tomtom ta so igabgaaba wal kankaanaŋan ta tizorzooro na, ni ko indeeŋe pataŋana.

Tomtom ta so mataana iŋgalŋgal itunu mi imborro kat kwoono, nako imbot ambai. Mi tomtom ta so ikam kat ŋgar som mi iwirri sorok sua, ina ni ipasaana itunu.

Tomtom ta so lutuunu ikamam ŋoobo mbulu mi ni ibalisi som, na iurur kat leleene pa lutuunu som. Mi tomtom ta so iurur kat leleene pa lutuunu, nako karau men mi ipazali mi iurpe mbulu kini.

Sombe tanamnaama koroŋ sa mi ipet karau som, inako ikam ma lelende isaana. Mi talala ma sombe takam koroŋ tana, inako ikam ma menmeen ti, mi tayamaana kembei mbotŋana kiti ambai.

Tomtom ta ikamam kat mbulu na, mbulu kini ndeeŋeŋana ko iporoukalkaali ma imbotmbot ambai. Mi zin wal ta mbulu kizin irao som na, mbulu kizin sananŋana ko ipasaana zin ma tisaana kat.

Pat ta ka usomŋana mi ipet sorok, nako imap karau men mi ka ŋonoono sa som. Mi tomtom ta so ikamam uraata mi iurur pat kini ilalae, na pat tana ko ipet ma iwe biibi.

Mbulu ki tapakurkur itundu, ina ipiyotyooto ŋoŋi boozo. Mi zin wal ta tileŋleŋ la sua na, ŋgar ambaiŋana imbotmbot la lelen.

Mazwaana ta so tomtom ambaiŋana imbotmbot toono na, ni ikamam le koroŋ boozo. Tana kaimer sombe imeete, na lutuunu ma tumbuunu bizin ko tikam len matamur ambaiŋana. Mi zin wal ta mbulu kizin irao pa Anutu mataana som na, koroŋ boozomen ta tindoundou na, kaimer ko iwe wal ndeeŋeŋan len.

Pikin ta le ŋgar ambaiŋana, nako ileŋ la sua tutŋana ki tamaana. Mi zin wal ta tipakurkur zitun mi tirepilpiili ŋgar ambaiŋana na, sombe tayaamba zin, na irao tileŋ la kalŋanda na som.

Tomtom ta so ileŋsil sua tutŋana, na kaimer ko imbot ŋoobo mi ka miaŋ biibi. Mi tomtom ta so ileŋleŋ la sua pazalŋana, na kaimer zaana ko iwe biibi.